जळगाव/धुळे/नंदुरबार : कोरोनाच्या दुसऱ्या मोठ्या लाटेत (corona 2nd weve) वीजपुरवठा (Power supply) सुरळीत ठेवण्यासाठी युद्धपातळीवर कार्यरत महावितरणने दैनंदिन ग्राहक सेवेचे कर्तव्य चोखपणे बजावत मार्चमध्ये ६६ हजार ३१०, एप्रिलमध्ये एक लाख ४४ हजार ६५१ व मेमध्ये एक लाख तीन हजार ४४८ अशा उच्च व लघुदाबाच्या तब्बल तीन लाख १४ हजार ४०९ नवीन वीजजोडण्या ( New Power connections) कार्यान्वित केल्या आहेत. अध्यक्ष व व्यवस्थापकीय संचालक विजय सिंघल (Chairman and Managing Director Vijay Singhal) यांच्या नेतृत्वात महावितरणने ही उल्लेखनीय कामगिरी केली. दरम्यान, गेल्या वर्षी कोरोनाच्या पार्श्वभूमीवर लॉकडाउनमुळे वीजमीटरचा तुटवडा झाला होता. तो दूर करण्यासाठी महावितरणने (mahavitaran) निविदा अंतर्गत पुरवठादारांना सिंगल फेजचे १८ लाख, तर थ्री फेजचे एक लाख ७० हजार नवीन वीजमीटरच्या पुरवठ्याचे कार्यादेश यापूर्वीच दिले आहेत. आतापर्यंत सिंगल व थ्री फेजचे नऊ लाख ५३ हजार नवीन वीजमीटर उपलब्ध झाले असून, ते पुणे, नागपूर, औरंगाबाद व कल्याण प्रादेशिक कार्यालयांना पाठविले आहेत.
(corona period three lakh new electricity connections)
कोरोनाच्या दुसऱ्या लाटेचा प्रादुर्भाव तीव्र स्वरूपात होता. त्यामुळे अत्यावश्यक वीजपुरवठ्याची सेवा देण्यासाठी महावितरणचे अभियंता व कर्मचारी युद्धपातळीवर अहोरात्र कर्तव्य बजावत होते. सोबतच तातडीच्या आवश्यकतेनुसार ऑक्सिजन प्लांट, नवीन कोविड रुग्णालये, विलगीकरण कक्ष, लसीकरण केंद्रांना केवळ २४ ते ४८ तासांमध्ये नवीन वीजजोडणी किंवा वाढीव वीजभार देण्यात आले. यासाठी ऊर्जामंत्री डॉ. नितीन राऊत (Energy Minister Dr. Nitin Raut) यांनी वैयक्तिक लक्ष घातले आणि वरिष्ठ पातळीवर आढावा बैठकांद्वारे या कामांना वेग दिला. ही कामे सुरू असताना, कोरोनाचे नियम पाळून दैनंदिन ग्राहकसेवा सुरू ठेवली. महावितरणने मार्च, एप्रिल व मे या तीन महिन्यांत उच्चदाब वर्गवारीमध्ये उद्योग- १७९, वाणिज्यिक- २४, कृषी- ७ आणि इतर ४० अशा एकूण २५० नवीन वीजजोडण्या, तर लघुदाब वर्गवारीत घरगुती दोन लाख ३३ हजार ४२७, वाणिज्यिक ३८ हजार २४, औद्योगिक ६६५०, कृषी ३१ हजार ४७५, सार्वजनिक पाणीपुरवठा योजना ३८३ व इतर ४,२०० अशा एकूण तीन लाख १४ हजार १५९ नवीन वीजजोडण्या कार्यान्वित केल्या आहेत.
अतिशय खडतर व संकटकाळात ग्राहक सेवा देणाऱ्या महावितरणच्या सर्व कर्मचाऱ्यांचे अध्यक्ष व व्यवस्थापकीय संचालक सिंघल यांनी कौतुक केले. कोरोनाची दुसरी लाट सध्या ओसरली असली, तरी ग्राहकसेवा देताना कोरोनाच्या प्रतिबंधात्मक उपायात हयगय करू नये. कर्मचाऱ्यांनी आरोग्याची पूर्णतः गांभीर्याने काळजी घ्यावी, असे आवाहन त्यांनी केले आहे.
महावितरणने सिंगल व थ्री फेजच्या १९ लाख ७० हजार नवीन वीजमीटरचा पुरवठा करण्याचे कार्यादेश फेब्रुवारीत दिले होते. त्यामुळे नवीन वीजमीटरचा पुरवठा सुरळीत झाला आहे. आतापर्यंत सिंगल फेजचे आठ लाख ६८ हजार आणि थ्री फेजचे ८५ हजार मीटर उपलब्ध झाले असून, ते प्रादेशिक कार्यालयांना पाठविले आहेत. यात (कंसात थ्री फेज) पुणे प्रादेशिक कार्यालय- सिंगल फेज दोन लाख ६९ हजार (३०,६०३), कोकण- सिंगल फेज तीन लाख २४ हजार (२५,७८७), नागपूर- एक लाख ९३ हजार (१८,३६०) आणि औरंगाबाद प्रादेशिक कार्यालयास सिंगल फेजचे ८२ हजार व थ्री फेजचे दहा हजार २५० नवीन वीजमीटर पाठविले आहेत.
Esakal
