IND vs NZ : KL राहुलला प्रदुषणासंदर्भातील बाउन्सर; मिळालं हे उत्तर

न्यूझीलंड विरुद्धच्या टी-20 मालिकेसाठी भारतीय संघ सज्ज झालाय. संघातील काही खेळाडूंनी सोमवारी सराव सत्रातही भाग घेतल्याचे पाहायला मिळाले. भारत आणि न्यूझीलंड यांच्यात 17 नोव्हेंबरपासून तीन सामन्यांच्या टी-20 मालिकेला सुरुवात होणार आहे. या मालिकेतील पहिला सामना जयपूरच्या मैदानात खेळवण्यात येणार आहे. या सामन्यापूर्वी राजधानी दिल्लीप्रमाणे जयपूर शहरातही हवेचा दर्जा खराब झाला आहे.

त्यामुळेच सामन्यापूर्वी भारतीय टी-20 संघाचा उप- कर्णधार लोकेश राहुल याला जयपूर शहरातील वायू प्रदुषणाच्या मुद्यावर प्रश्न विचारण्यात आला होता. सराव सत्राला सुरुवात करण्यापूर्वी प्रसारमाध्यमांनी त्याला हा प्रश्न विचारला. यावर लोकेस ऱाहुल म्हणाला की, आम्ही आता बाहेर पडलोय. स्टेडियमवर येताना प्रदुषण मोजण्याचं यंत्र सोबत आणलेलं नाही. त्यामुळे प्रदुषणाचा स्तर नेमका किती याची माहिती नाही. आम्ही सर्वजण इथे क्रिकेट खेळायला आलोय. सामन्यात प्रदुषणाचा काही व्यत्यय येणार नाही, अशी आशाही त्याने यावेळी व्यक्त केली.