पोलिस कोठडीतून येऊन मतदान केलेल्या माजी आमदाराकडून अजित पवारांच्या उमेदवाराचा पराभव

वडूज : जिल्हा मध्यवर्ती बँकेच्या निवडणुकीत खटाव सोसायटी मतदार संघातून माजी आमदार व अपक्ष उमेदवार प्रभाकर घार्गे यांचा दहा मतांनी विजय झाला. त्यांचे प्रतिस्पर्धी सहकार पॅनेलचे उमेदवार नंदकुमार मोरे यांना 46 मते मिळाली. विजयानंतर घार्गे समर्थकांनी जोरदार जल्लोष केला.

जिल्हा मध्यवर्ती बँकेसाठी खटाव सोसायटी मतदार संघातून उमेदवारीसाठी माजी आमदार श्री. घार्गे व जिल्हा नियोजन मंडळाचे माजी सदस्य नंदकुमार मोरे यांच्यातील उमेदवारी बाबत गेल्या काही दिवसांत चर्चा सुरु होती. श्री. घार्गे हे एका खटल्यात न्यायालयीन प्रक्रियेत अडकल्याने खटाव तालुक्यातील राष्ट्रवादीतील एका गटाने मोरे यांचे समर्थन करीत घार्गे यांच्या विरोधात मोर्चे बांधणी केली होती. श्री. घार्गे यांच्या पत्नी इंदिरा घार्गे यांनीही सोसायटी मतदार संघ व महिला राखीवमधून उमेदवारी अर्ज दाखल केला होता. श्री. घार्गे यांच्या उमेदवारीबाबत पक्षातूनच शह- काटशहाचे राजकारण सुरू होते. त्यामुळे अखेरीस श्री. घार्गे यांनीच सोसायटी मतदार संघातून अपक्ष उमेदवारी करण्याचा निर्धार घार्गे समर्थकांनी केला.