सिंधुदुर्ग : पुढारी वृत्तसेवा
संपूर्ण महाराष्ट्रात गाजलेल्या सिंधुदुर्ग जिल्हा बँक संचालक मंडळाच्या पंचवार्षिक सार्वत्रिक निवडणुकीसाठी गुरुवारी चुरशीने मतदान झाले. दरम्यान, आज 31 डिसेंबर रोजी सकाळी 9 वाजल्यापासून सिंधुदुर्गनगरी येथे शिक्षक पतपेढी सभागृहात मतमोजणी सुरु आहे. यात महाविकास आघाडीचे नेतृत्व करणारे जिल्हा बॅंकेचे विद्यमान अध्यक्ष सतीश सावंत पराभूत झाले आहेत. त्यांच्या विरोधात राणे गटातील विठ्ठल देसाई होते. दोघांनाही १७-१७ मते पडल्याने टाय झाले. पण चिठ्ठी काढून विठ्ठल देसाई यांना विजयी घोषित करण्यात आले आहे. आतापर्यंत भाजपचे ५ आणि महाविकास आघाडीचे ४ संचालक विजयी झाले आहेत.
काल झालेल्या मतदानावेळी जिल्ह्यातील एकूण 981 पैकी तब्बल 968 मतदारांनी म्हणजे 98.67 टक्के मतदारांनी मतदानाचा हक्क बजावला. यामध्ये 115 महिला व 853 पुरुषांचा समावेश होता.
गेल्या काही दिवसांपासून गाजत असलेल्या निवडणुकीचा फैसला काय असेल? याकडे संपूर्ण महाराष्ट्राचे लक्ष लागून राहिले आहे.
कुडाळ, दोडामार्ग, मालवण या तीन तालुक्यात 100 टक्के तर वेंगुर्ले तालुक्यात सर्वात कमी म्हणजे 94.97 टक्के मतदान झाले होते.
सिंधुदुर्ग जिल्हा मध्यवर्ती सहकारी बँक संचालक मंडळाच्या निवडणूक मतमोजणी ओरोस येथील माध्यमिक शिक्षक पतपेढी हॉल मध्ये होत असून या मतमोजणीसाठी जवळपास 60 अधिकारी व कर्मचारी कार्यरत आहेत.
