नवी दिल्ली : दिग्गज ऑटो कंपनी टोयोटा किर्लोस्कर मोटर्स लिमिटेडचे उपाध्यक्ष विक्रम किर्लोस्कर यांचे मंगळवार रात्री निधन झाले आहे. किर्लोस्कर ६४ वर्षांचे होते. टोयोटा किर्लोस्कर मोटर लिमिटेडमध्ये किर्लोस्कर समूहाची हिस्सेदारी केवळ ११ टक्के होती पण विक्रम किर्लोस्कर भारतातील टोयोटाचा प्रमुख चेहरा होते. टोयोटा गाडी भारतात लोकप्रिय बनवण्याचे संपूर्ण श्रेय त्यांना जाते. त्यांच्या पश्चात पत्नी गीतांजली आणि मुलगी मानसी किर्लोस्कर असा परिवार आहे.

विक्रम किर्लोस्करची लेक, मानसीबद्दल बोलायचे तर तिचे लग्न रतन टाटा यांचे सावत्र भाऊ नोएल टाटा यांचा मुलगा नेविल टाटा यांच्याशी झाले आहे. अशा प्रकारे विक्रम किर्लोस्कर आणि रतन टाटा व्याही आहेत. ते CII आणि सोसायटी ऑफ इंडियन ऑटोमोबाइल मॅन्युफॅक्चरर्सचे अध्यक्ष देखील होते. यासोबतच त्यांनी ARAI मध्ये महत्त्वाची भूमिका बजावली पण, लक्षणीय म्हणजे विक्रम किर्लोस्कर प्रसिद्धीपासून ते नेहमीच चार हात लांब राहिले.

किर्लोस्कर समूहाची चौथी पिढी
प्रसिद्धीपासून दूर राहिलेले विक्रम किर्लोस्कर १३४ वर्षे जुन्या किर्लोस्कर समूहातील चौथ्या पिढीतील व्यावसायिक होते. तर अभियांत्रिकी क्षेत्रातील अवजड कंपनीला वाहन उद्योगात मान्यता मिळवून देण्याचे श्रेय त्यांना जाते. त्यांनी मॅसॅच्युसेट्स इन्स्टिट्यूट ऑफ टेक्नॉलॉजी मधून मेकॅनिकल इंजिनिअरिंगमध्ये पदवीधर शिक्षण पूर्ण केले. किर्लोस्कर १९८१ पासून ऑटोमोबाईल क्षेत्राशी संबंधित होते. ते CII आणि सोसायटी ऑफ इंडियन ऑटोमोबाइल मॅन्युफॅक्चरर्सचे अध्यक्ष होते. यासोबतच ते किर्लोस्कर सिस्टीम्स लिमिटेडचे अध्यक्ष आणि एमडी होते तसेच टोयोटा किर्लोस्कर मोटर प्रायव्हेट लिमिटेडचे उपाध्यक्ष होते. टोयोटा ग्रुपने १९९७ मध्ये भारतात ऑटोमोबाईल क्षेत्रात प्रवेश केला.

‘टोयोटा’ला लोकप्रिय करणारा उद्योजक काळाच्या पडद्याआड, विक्रम किर्लोस्कर यांचं निधन
टाटांशी संबंध
विक्रम किर्लोस्कर यांना गोल्फ आणि टेनिसची आवड होती. तसेच, त्यांनी पोहण्यात (स्विमिंग) खूप रस होता. त्यांची मुलगी मानसी ग्रुपच्या अनेक कंपन्यांमध्ये गुंतलेली आहे. मानसी आणि नेविल टाटा जुलै २०१९ मध्ये लग्नबंधनात अडकले. टाटा सन्सचे माजी चेअरमन रतन टाटा यांनी देखील या लग्नसोहळ्याला उपस्थिती लावली. नेव्हिलचे वडील नोएल, टाटा ट्रेंट लिमिटेड आणि टाटा इन्व्हेस्टमेंट कॉर्पोरेशनचे अध्यक्ष आहेत. नोएल टाटा नेहमीच लो प्रोफाइल ठेवतात. त्यांची मुले देखील त्यांच्याप्रमाणे राहतात. नेव्हिल, ट्रेंट हायपरमार्केट प्रायव्हेट लिमिटेडचे प्रमुख आहेत.

टोयोटाचा प्रमुख चेहरा
टोयोटा किर्लोस्कर मोटर लिमिटेड कंपनीत टोयोटाची ८९ टक्के हिस्सेदारी असून किर्लोस्कर समूहाकडे केवळ ११ टक्के हिस्सा आहे पण असे असूनही विक्रम किर्लोस्कर भारतातील टोयोटाचा चेहरा होते. कंपनीने क्वालिस १९९९ मध्ये आणि २००२ मध्ये कोरोला लॉन्च केली. यानंतर कंपनीने २००५ मध्ये इनोव्हा मिनीव्हॅन बाजारात आणली. २००७ मध्ये टोयोटाने ५०,००० युनिट विक्रीचा टप्पा ओलांडला.

नेविल टाटा-मानसी किर्लोस्कर अडकणार लग्नाच्या बेडीत
यानंतर कंपनीने २००९ मध्ये फॉर्च्युनर एसयूव्ही लाँच केली. लक्षणीय आहे की जपानी दिग्गज टोयोटाशी किर्लोस्कर यांचे नाते केवळ ऑटोमोबाईल्सपुरते मर्यादित नाही, तर कापड यंत्रसामग्री, विमा, रिअल इस्टेट आणि आरोग्यसेवा या दोन्ही कंपन्यांमध्ये संयुक्त उपक्रम आहेत. २०२० मध्ये इंडियन इन्स्टिट्यूट ऑफ मेटलने त्यांना मेटलर्जिकल इंडस्ट्रीजमधील उत्कृष्टतेसाठी JRD टाटा पुरस्काराने सन्मानित करण्यात आले.

विक्रम किर्लोस्कर भारतीय वाहन उद्योगातील सर्वात स्पष्ट बोलणारे लोक होते. अलीकडेच त्यांनी म्हटले की १० वर्षांच्या कालावधीत वाहनांवरील कर निम्म्यावर आणण्यासाठी रोडमॅप तयार करण्याची गरज आहे. असे झाल्यास भारतीय वाहन उद्योग जागतिक स्तरावर अधिक स्पर्धात्मक होईल आणि त्यामुळे मोठ्या प्रमाणावर रोजगाराच्या संधी निर्माण होतील, ज्याचा फायदा अर्थव्यवस्थेला होईल, असेही त्यांनी म्हटले. सध्या वाहनांवर २८ टक्के जीएसटी आकारला जातो. तसेच, त्याच्यावर एक ते २२ टक्क्यांपर्यंत उपकर लावला जातो. त्याचप्रमाणे परदेशातून आयात केलेल्या गाड्यांवर ६० ते १०० टक्के कर आकारला जातो. किर्लोस्कर म्हणाले की, हळूहळू कर कमी केल्यास रोजगार आणि आर्थिक विकासाला चालना मिळेल.

LEAVE A REPLY

Please enter your comment!
Please enter your name here