या तरुणाचे नाव राकेश मेहानी (वय ४२) असे आहे. राकेश हा कटनी येथील संतनगर परिसरात वास्तव्याला होता. गुरुवारी दुपारी राकेश नेहमीप्रमाणे साईमंदिरात आला. तो साईबाबांच्या प्रतिमेचे दर्शन घेण्यासाठी खाली बसला. यानंतर तो साईचरणी नतमस्तक झाला. बराचवेळ राकेश तशाच अवस्थेत बसून होता. त्याच्यासोबत आलेले इतर लोक दर्शन घेऊन निघून जात होते. मात्र, बराचवेळ होऊन राकेशची कोणतीही हालचाल दिसली नाही. तेव्हा एका माणसाने त्याठिकाणी जात राकेशची विचारपूस करण्याचा प्रयत्न केला. तेव्हा राकेशचा मृत्यू झाल्याचे दिसून आले. डॉक्टरांकडून राकेशच्या मृत्यूचे प्राथमिक कारण हृदयविकाराचा झटका हे मानले जात आहे. ही संपूर्ण घटना मंदिरातील सीसीटीव्ही कॅमेऱ्यात कैद झाली. हा व्हिडिओ सध्या सोशल मीडियावर तुफान व्हायरल होत आहे.
यापैकी एका व्हिडिओत राकेश मेहानी याने साईबाबांचे दर्शन घेतल्यानंतर तो प्रदक्षिणा घालताना दिसत आहे. त्यानंतर राकेश साईबाबांच्या तसबिरीसमोर नतमस्तक झाला. बराचवेळ झाला तरी राकेश याच अवस्थेत बसून होता. त्याची कोणतीही हालचाल दिसत नसल्याचे पाहून मंदिरातील कर्मचारी त्याच्याजवळ गेले. कर्मचाऱ्यांनी राकेशला हलवले, मात्र त्याचे शरीर निश्चेष्ट पडून होते. यानंतर राकेशला तातडीने नजीकच्या रुग्णालयात नेण्यात आले. याठिकाणी राकेश मेहानी याला मृत घोषित करण्यात आले. राकेशच्या मृतदेहाचे शवविच्छेदन होणे बाकी आहे. त्यानंतर राकेशच्या मृत्यूमागील नेमक्या कारणाचा उलगडा होईल. मात्र, प्राथमिक अंदाजानुसार राकेश मेहानी याला हृदयविकाराचा झटका आला असावा, अशी शक्यता वर्तविली जात आहे.
अरेरे! ५ फुटी सळई उडाली, ट्रेनची खिडकी फोडून मानेतून आरपार गेली; ३ दिवसांनंतर होता वाढदिवस
राकेशची आर्थिक परिस्थिती बिकट
राकेश मेहानी याची सध्याची आर्थिक स्थिती हालाखीची होती. तो संतनगर परिसरात आपल्या बायको आणि मुलीसह भाड्याच्या घरात राहत होता. तो एका मेडिकलच्या दुकानात कामाला होता. राकेश हा साईभक्त होता, तो दर गुरुवारी साईबाबांच्या मंदिरात जात असे. गुरुवारी दुपारी तो नेहमीप्रमाणे दुकानातून साईबाबांच्या मंदिरात आला होता. मी थोडावेळात मंदिरात जाऊन परत येतो, असे राकेशने दुकानाच्या मालकाला सांगितले होते. मात्र, काहीवेळातच राकेशला मृत्यू झाल्याची माहिती दुकान मालकाला समजली.
मंदिरातील पुजारी काय म्हणाले?
साई मंदिरातील पुजारी प्रदीप कुमार त्रिपाठी यांनी या घटनेबद्दल माहिती दिली. त्यांनी म्हटले की, गुरुवारी राकेश नेहमीप्रमाणे मंदिरात आला होता. आल्यावर त्याने साईबाबांचे दर्शन घेतले, प्रदक्षिणा घातली आणि त्यानंतर साईबाबांच्या चरणांवर डोके ठेऊन बसला. काही मिनिटं झाली तरी राकेश त्याच अवस्थेत होता. हे पाहून इतर भाविकांनी मंदिरातील कर्मचाऱ्यांना कळवले. मंदिरातील कर्मचाऱ्यांनी राकेशला हलवून पाहिले, त्याला पाणी पाजण्याचा प्रयत्न केला. परंतु, राकेशकडून कोणताही प्रतिसाद मिळाला नाही. त्यामुळे राकेशला नजीकच्या रुग्णालयात दाखल करण्यात आले. परंतु, तोपर्यंत राकेश मेहानी याचा मृत्यू झाला होता.
