उस्मानाबाद : उस्मानाबाद येथील जिल्हाधिकारी कार्यालयात पीकविम्यावर शेतकऱ्यांच्या तक्रारी ऐकून घेण्यासाठी शनिवारी बैठक आयोजित करण्यात आली होती. या बैठकीत शिवसेना उद्धव बाळासाहेब ठाकरे या पक्षाचे खासदार ओमप्रकाश राजेनिंबाळकर आणि भाजप आमदार राणा जगजितसिंह पाटील यांच्यात जोरदार शाब्दिक चकमक उडाली. या दोन्ही लोकप्रतिनिधींनी एकमेकांना जिल्हाधिकारी सचिन ओंबासे यांच्यासमोर एकेरी भाषा वापरली. ‘तू औकातीत राहा, तुझी आणि तुझ्या कुटुंबाची औकात आणि संस्कार सर्वांना माहीत आहे,’ अशा खरमरीत शब्दांत खासदार ओमप्रकाश यांनी राणा पाटलांना फटकारलं. दोन लोकप्रतिनिधींमध्ये झालेल्या या हमरीतुमरीमुळे जिल्ह्यातील राजकीय वातावरणही चांगलंच ढवळून निघालं. जिल्हाधिकारी कार्यालयात झालेल्या या राड्यानंतर ओमप्रकाश राजेनिंबाळकर यांनी फेसबुक एक पोस्ट लिहीत पुन्हा एकदा राणा पाटलांना डिवचलं आहे.

‘कलेक्टर कचेरीत पीकविम्याबाबत अधिकाऱ्यांशी चर्चा करीत असताना एका आमदाराने त्याच्या नेहमीच्या पद्धतीने विषयाला फाटा द्यावा म्हणून वैयक्तिक मला लक्ष्य करण्याचा प्रयत्न केला. सोन्याचा चमचा घेऊन व आजूबाजूला चमचे मंडळी ठेऊन सर्वांवर रुबाब करायची त्यांना सवय आहे. परंतु त्यांचा सामना आज या “पवनराजे” साहेबांच्या मुलाशी झाला आणि आगीशी का खेळू नये हे आता त्याला नक्कीच कळले असेल. यांनी संस्कार बद्दल बोलावे म्हणजे पाकिस्तानने दहशवाद्यांविरोधात बोलावे असे आहे,’ अशा शब्दांत ओमप्रकाश राजेनिंबाळकर यांनी आपल्या फेसबुक पोस्टमधून आमदार राणा पाटील यांचा समाचार घेतला आहे.

Rajan Salvi : ACBच्या नोटीसवर आमदार साळवींची पहिली प्रतिक्रिया; मुख्यमंत्री, उपमुख्यमंत्र्यांचे षडयंत्र…

‘आम्ही शांत असतो, पण षंढ नसतो…कधीही भिडायला तयार’

जिल्हाधिकारी कार्यालयात झालेल्या राड्यानंतर खासदार ओमराजेंनी राणा पाटील यांना पुन्हा एकदा खुलं आव्हान दिलं आहे. ‘लोकशाहीत जनता हीच खरी राजा असते, आता लोकांच्या जहागिरी व जहागीरदारी दोन्ही संपल्या आहेत. तुम्ही दहशतीने आम्हाला दाबाल व आम्ही दबू असा गैरसमज आज मिटला असेल. राजकारणात लोकांसाठी राजकारण करताना मी कायमच वैयक्तिक हेवेदावे टाळत असतो, आम्ही शांत असतो पण षंढ नसतो. आज समोरच्याला कळेल या भाषेत समजावले. इथून पुढेही गरज पडेल तेव्हा लोकांसाठी कोणालाही कधीही भिडायला आम्ही तयार आहोत. जिथे माझे चुकत नाही तिथे आपण झुकत नाही,’ असं ओमराजेंनी म्हटलं आहे.

जिल्हाधिकारी कार्यालयात नेमकं काय घडलं?

राणा व निंबाळकर या दोन कुटुंबात असलेला वाद सर्वश्रुत आहे. त्यात शनिवारच्या या घटनेची भर पडली. पंतप्रधान पीक विमा योजनेंतर्गत शेतकऱ्यांना नुकसानभरपाई मिळत आहे. मात्र त्यात अनेक त्रुटी, तफावत आहे. ती चूक संबंधित अधिकाऱ्यांच्या लक्षात आणून देण्यासाठी उस्मानाबाद जिल्हाधिकारी कार्यालयात बैठक आयोजित करण्यात आली होती. जिल्हाधिकारी डॉ. सचिन ओंबासे, आमदार राणा जगजितसिंह पाटील यांच्यासह कृषी, महसूलचे अधिकारी उपस्थित होते. बैठक सुरू झाल्यानंतर खासदार निंबाळकर सभागृहात आले. चर्चेदरम्यान आमदार, खासदारांमध्ये नाव न घेता एकेरी भाषा वापरण्यात येऊ लागली. राणा यांनी ओमराजे यांचा ‘बाळा’ असा उल्लेख केल्यानंतर ओमराजे संतापले. दोघांत सुरू असलेल्या शाब्दिक चकमकीमुळे सभागृहात तणाव निर्माण झाला. जिल्हाधिकाऱ्यांनी मध्यस्थी करण्याचा प्रयत्न केला. मात्र दोघांनीही एकमेकांवर शेलक्या शब्दांत टोलेबाजी केली.

LEAVE A REPLY

Please enter your comment!
Please enter your name here