Authored by prasad lad | Maharashtra Times | Updated: 4 Dec 2022, 8:53 pm

IND vs BAN : भारताने बांगलादेशची ९ बाद १३६ अशी अवस्था केली होती. त्यामुळे भारत हा सामना जिंकणार, असे वाटत होते. पण शार्दुल ठाकूरच्या एका षटकात हा सामना भारताच्या हातून निसटल्याचे पाहायला मिळाले. शार्दुलच्या एका षटकात असं नेमकं घडलं तरी काय, जेणेकरून सामना जिंकणारा भारत हा पराभूत झाला, जाणून घ्या…

 

IND v BAN
सौजन्य-ट्विटर
मिरपूर : भारतीय संघ बांगलादेशबरोबरचा पहिला सामना जिंकेल, असे वाटत होते. कारण भारतानने बांगलादेशची ९ बाद १३६ अशी अवस्था केली होती आणि त्यांना विजयासाठी ५१ धावांची गरज होती. त्यामुळे भारत हा सामना सहज जिंकेल, असे वाटत होते. पण शार्दुुल ठाकूरच्या एकाच षटकात भारतीय संघाच्या हातून हा सामना निसटल्याचे पाहायला मिळाले.

ही गोष्ट घडली ती ४३व्या षटकात. बांगलादेशचा मेहंदी हसन मिर्झा हा त्यावेळी फलंदाजी करत होता. शार्दुलच्या या ४३व्या षटकाच्या तिसऱ्या चेंडूवर मेहंदी मोठा फटका मारायला गेला आणि त्यामध्येच फसला. तिसऱ्या चेंडूवर हसनचा झेल उडाला होता. हा एकदम सोपा झेल यष्टीरक्षण करत असलेल्या लोकेश राहुलसाठी होता. राहुल हा सोपा झेल पकडणार आणि भारतीय संघ विजयी ठरणार, असे सर्वांनाच वाटत होते. पण राहुलकडून यावेळी मोठी चूक घडली आणि त्याचा फटका भारतीय संघाला बसला. कारण हा झेल सोपा असला तरी तो राहुलला पकडता आला नाही आणि त्याच्या हातून हा झेल सुटला. त्यामुळे भारतीय संघाला या गोष्टीचा मोठा फटका बसला. कारण हा झेल राहुलने पकडला असता तर भारताला विजय मिळवता आला असता. ही गोष्ट फक्त एवढ्यावरच थांबली नाही. कारण या पुढच्या चेंडूवर अजून एक संधी भारतासाठी चालून आली होती.

शार्दुलच्या या ४३ व्या षटकाच्या चौथ्या चेंडूवर पुन्हा एकदा मेहंदीचा झेल उडाला. पण हा झेल टिपण्यासाठी वॉशिंग्टन सुंदर पुढेच आला नाही. त्यामुळे हा चेंडू मैदानातच पडला. हा झएल जरी सुंदरने पकडला असता तरीदेखील भारताला विजय मिळवता आला असता. पण राहुलनंतर सुंदर हा झेल पकडण्यात अपयशी ठरले आणि शार्दुलच्या या ४३ व्या षटकात सामना बांगलादेशच्या बाजूने फिरल्याचे पाहायला मिळाले. शार्दुलची या षटकात एकही चूक नव्हती. उलट शार्दुलला या षटकात विकेट मिळाली असती आणि भारताला विजय मिळवता आला असता. पण शार्दुलच्या एका षटकात हे दोन्ही झेल सुटले आणि त्यामुळेच भारताला पराभव पत्करावा लागला.

Marathi News App: तुम्हालाही तुमच्या अवतीभवती होत असलेल्या बदलांमध्ये सहभागी व्हायचं आहे? सिटिझन रिपोर्टर अॅप डाउनलोड करा आणि रिपोर्ट्स पाठवा.

LEAVE A REPLY

Please enter your comment!
Please enter your name here