मुलगा नाल्यात वाहून गेला; चोवीस तास शोध घेऊनही सापडला नाही

म.टा.विशेष प्रतिनिधी,नागपूरः कळमना परिसरातील गुलमोहर नगरातील नाल्यात वाहून गेलेल्या दहा वर्षीय मुलाचा दुसऱ्या दिवशीही मनपाच्या अग्निशमन पथकाने शोधाशोध केली. तब्बल चोवीस तास ही मोहिम सुरू होती. मंगळवारी परत सकाळी शोधमोहिम सुरू करण्यात येणार आहे. शहराबाहेर वाहून जाणाऱ्या नागनदीच्या १० किमी पर्यंतच्या पात्रापर्यंत हा शोध सुरू होता. नाल्यातील कचऱ्यामुळे शोधकार्यातील बोटही बंद पडली.

रविवारी दुपारी एक १० वर्षाचा मुलगा नेहल शेखर मेश्राम गुलमोहर नगरातील सिमेंट पोलवरुन पाय घसरुन वाहून गेला. पाण्याचा वेग जास्त असल्याने तो क्षणात दिसेनासा झाला. रविवारी सायंकाळपर्यंत भरतवाडयापर्यंत शोधमोहिम राबविण्यात आली. सोमवारी सकाळी परत शोध सुरू करण्यात आला. गुलमोहरनगरचा नाला पिवळी नदी व पुढे नाग नदीला मिळते. या दोन्ही नद्यांच्या संगमाजवळ एक वळण आहे. तेथे मुलगा सापडू शकतो, अशी शक्यता असल्याने या संपूर्ण पात्रात पथकाने कसून शोध घेतला. यासाठी अग्निशमन विभागच्या दोन बोटीही नाल्यात उतरविण्यात आल्या होत्या. यातील एक बोट दुपारच्या सुमारास कपडा अडकल्याने बंद पडली. त्यानंतर दुसऱ्या बोटीने मुलाचा सातत्याने शोध सुरू ठेवला. गेल्या दोन दिवसात किमान दहा किमीच्या परिसरात पथकाने शोधकार्य सुरूच ठेवले. यात कळमना, गंजीपेठ आणि सक्करदरा अग्निशमन केन्द्राचे जवानाच्या चमूंनी पवनगांव, महालगांव – भंडारा पूल, जबलपुर राष्ट्रीय महामार्ग पर्यंत नदीपात्रापर्यत शोध घेतला. परंतु दुर्देवाने त्याचा शोध अद्यापही लागलेला नाही. या शोधकार्यात पथकाला मुलाचे कुटुंबीय व शेजारी नागरिकांनीही मदत केली. या शोध कार्यात अग्निशमन विभागाचे सब ऑफीसर शौकत अली, ज्ञानेश्वर मोहूतूरे, फायरमन राजू पवार, शरद न्यूमंड, योगेश खोडके, पुंडलीक मोहूर्ले, शिवचरण यादव, ड्रायवर सर्वश्री. अकलिम शेख, मंगेश राणे, ज्ञानेश्वर डोंगे, संदीप देशमूख, धनराज बावणे इत्यादी सहभागी आहेत.

मासेमारी करणाऱ्यांची मदत घेणार

अग्निशमन पथकातील जवान नाला व नदीपात्रात शक्य तिथे शोध घेत आहे. यात आता भरतवाडयाजवळ असलेल्या भागात मासेमारी करणाऱ्यांची ही मदत घेणार आहे. अनेकांनी ही सूचना केल्याने मुलाच्या शोधासाठी शक्य ते सर्व पर्यायाचा वापर करण्याचे पथकाने ठरविले आहे.