Authored by विजयसिंह होलम | Edited by रोहित धामणस्कर | महाराष्ट्र टाइम्स.कॉम | Updated: 6 Dec 2022, 3:27 pm

Yuvasena leader Sharmila Yewale | गेल्या काही दिवसांपासून युवासेनेच्या पदाधिकाऱ्यांमध्ये खदखद पाहायला मिळत आहे. विशेषत: पुण्यातील युवासेनेत मोठा असंतोष आहे. काही दिवसांपूर्वीच याचे पडसाद उमटले होते. परंतु, तेव्हा युवासेना सरचिटणीस वरुण सरदेसाई यांनी पझडड कशीबशी थोपवून धरली होती. त्यानंतर अवघ्या काही दिवसांतच पुण्यात शर्मिला येवले यांच्या रुपाने युवासेनेला खिंडार पडले आहे.

 

Yuvasena leader Sharmial Yewale
शर्मिला येवले युवासेनेतून बाहेर पडणार?

हायलाइट्स:

  • लढवय्यी शेतकरी कन्या शिंदे गटाच्या वाटेवर?
  • पक्षाला कार्यकर्त्यांची गरज असते, कार्यकर्त्याला नाही
  • शर्मिला येवले यांचे वक्तव्य
अहमदनगर: विद्यार्थी संघटना आणि शेतकरी आंदोलनातून पुढे आलेली युवा कार्यकर्ती, अकोलेतील शेतकरी कन्या शर्मिला सुभाष येवले आता शिंदे गटाच्या वाटेवर असल्याची माहिती मिळते. ठाकरे गटाच्या युवासेनेत ती सहसचिव होती. मात्र, या पदाला स्थगिती देण्यात आली आहे. यावर नाराजी व्यक्त करताना येवले हिने म्हटले आहे की, ‘पक्षाला कार्यकर्त्यांची गरज असते कार्यकर्त्याला पक्षाची नाही.’

गेल्या काही काळापासून शिवसेनेत महिला पदाधिकाऱ्यांच्या बाबतीत बऱ्याच घडामोडी सुरू आहेत. युवासेनेतही घडामोडी सुरू असून वरुण सरदेसाई यांनी सावरण्याचा प्रयत्न करूनही फारसे यश येत नसल्याचे दिसून येते. त्यामुळे येवलेसारखे काही नाराज पदाधिकारी मुख्यमंत्री एकनाथ शिंदे गटाच्या हाती लागण्याची शक्यता आहे. सप्टेंबर २०२१ पासून युवा सेनेते प्रदेश सहसचिव असलेल्या येवले यांच्या पदाला स्थगिती दिल्याचे जाहीर करण्यात आले आहे. यावर प्रतिक्रिया व्यक्त करताना येवले यांनी म्हटले आहे की, ‘माझ्यासारख्या ग्रामीण भागातील युवतीला शिवसेनेमध्ये काम करण्याची संधी दिली, पद दिलं ग्रामीण भागात शिवसेना युवासेना वाढीसाठी मला प्रयत्न करता आला. आता माझ्या पदाला स्थगिती दिल्याची माहिती मध्यवर्ती कार्यालयातून देण्यात आली आहे. पदाला स्थिगिती दिली असली तरी मी माझं काम चालूच ठेवले. पक्षाला कार्यकर्त्यांची गरज असते, कार्यकर्त्याला पक्षाची नाही. कार्यकर्ता हा सर्वसामान्य कुटुंबातून सर्व परिस्थितीची जाण ठेवून घडत असतो. मात्र कार्यकर्त्यांचं खच्चीकरण जर होत असेल तर पदत्याग केलेला काय वाईट,’ असे बोलून येवले यांनी युवासेना सोडण्याचे संकेत दिले आहेत.
Yuvasena: पुण्यातील युवासेनेच्या पदाधिकाऱ्याला काम थांबवण्याचे आदेश; महिनाभरापूर्वीच दिला होता राजीनामा
शर्मिला येवले ही अकोले तालुक्यातील इंदुरी येथील आहे. तिचे उच्च शिक्षण पुण्यात झाले. तिने विद्यार्थी संघटनेत काम केले. तिचे वडील प्रगतशील शेतकरी आहेत. शेतात वडिलांसोबत अनेकदा तिने शेतीत काम केले. प्रभावी भाषण शैली असलेल्या शर्मिलाने मराठा क्रांती मोर्चात भाषण केले होते. त्यानंतर स्वाभिमानी शेतकरी संघटनेच्या युवा शाखेवर तिची नियुक्ती झाली. शेतकऱ्यांच्या प्रश्नांवर तिने अनेक आंदोलनात भाग घेतला.

मात्र, ती चमकली ती २०१९ मध्ये मुख्यमंत्र्यांच्या ताफ्यावर शाईफेक केल्यानंतर. सप्टेंबर २०१९ मध्ये तत्कालीन मुख्यमंत्री देवेंद्र फडणवीस यांच्या महाजनादेश यात्रेच्या वेळी अकोले तालुक्यात त्यांच्या ताफ्यावर येवले हिने शाई फेकली होती. सरकारचे महापोर्टल बंद करावे, महिलांच्या सुरक्षेसाठी उपाययोजना कराव्यात, अशा विविध मागण्या करीत येवले यांनी शाईचा फुगा मुख्यमंत्र्यांचा ताफ्यातील वाहनांच्या दिशेने फेकला होता. याप्रकरणी शर्मिलाविरुद्ध पोलिसांनी गुन्हा दाखल केला होता. त्यामुळे चर्चेत आलेल्या येवले हिला ऑक्टोबरमध्ये शिवसेना पक्षप्रमुख उद्धव ठाकरे यांच्या उपस्थितीत शिवसेनेत प्रवेश देण्यात आला. यासाठी शिवसेनेच्या नेत्या डॉ. नीलम गोऱ्हे यांनी पुढाकार धेतला होता. पुढे युवासेनेचे पद तिला मिळाले. मधल्या घडामोडीतही ती ठाकरे यांच्या गटासोबत राहिली.

जवळच्या शहरातील बातम्या

Marathi News App: तुम्हालाही तुमच्या अवतीभवती होत असलेल्या बदलांमध्ये सहभागी व्हायचं आहे? सिटिझन रिपोर्टर अॅप डाउनलोड करा आणि रिपोर्ट्स पाठवा.

LEAVE A REPLY

Please enter your comment!
Please enter your name here