मुंबई: कर्नाटकचे मुख्यमंत्री बोम्मई दादागिरी करत असताना स्वत:ला भाई म्हणवणारे एकनाथ शिंदे काय करत आहेत. शिंदे स्वत:ला भाई बोलतात, मग आता त्यांनी कर्नाटकविरोधात भाईगिरी करुन दाखवावी. पण हे सरकार महाराष्ट्राच्या जमिनीचं रक्षण करण्यात अपयशी ठरलं आहे. त्यांना एक क्षणही सत्तेवर राहण्याचा अधिकारी नाही. गेल्या ५५ वर्षांत महाराष्ट्राने इतकं हतबल सरकार आणि मुख्यमंत्री पाहिला नव्हता. सरकारच्या दोन मंत्र्यांनी काल शेपूट घातले. हे कसले मर्द आणि स्वाभिमानी. हे तर नामर्दांचं सरकार आहे, अशी घणाघाती टीका ठाकरे गटाचे खासदार संजय राऊत यांनी केली. ते बुधवारी मुंबईत प्रसारमाध्यमांशी बोलत होते.

यावेळी संजय राऊत यांनी महाराष्ट्र आणि कर्नाटक यांच्या सुरु असलेल्या सीमावादाच्या मुद्द्यावरुन शिंदे-फडणवीस सरकारला लक्ष्य केले. गेल्या २४ तासांपासून कर्नाटकात ज्या पद्धतीने महाराष्ट्रातील वाहनांची तोडफोड होत आहे, ते सर्व सरकारी प्रेरणेने सुरु आहे. महाराष्ट्र एकीकरण समितीच्या कार्यकर्त्यांना घरात घुसून अटक केली जात आहे, त्यांना तुरुंगात डांबले जात आहे. आता आमचे मुख्यमंत्री आणि उपमुख्यमंत्री सीमावादावर तोडगा काढण्यासाठी दिल्लीत जाऊन केंद्रीय गृहमंत्र्यांची भेट घेणार आहेत. पण त्याची गरजच काय आहे, केंद्रीय गृहमंत्र्यांना काय चाललंय हे कळत नाही का? महाराष्ट्रावर अशी वेळ कधीही आली नव्हती. महाराष्ट्रातील सध्याचे सरकार हे डरपोक आहे, त्यांनी आपल्या सीमांची आणि जनतेची काळजी नाही, अशी टीका संजय राऊत यांनी केली.

राज्यात शिंदे-फडणवीसांचे सरकार आल्यापासून तीन महिन्यांत महाराष्ट्र म्हणजे दिल्लीच्या दारातील पायपुसणं झाला आहे. आर्थिकदृष्ट्या महाराष्ट्राला नाजूक करण्यासाठी प्रकल्प गुजरातला पाठवले जात आहे. मात्र, मुख्यमंत्री एकनाथ शिंदे तोंडाला कुलूप लावून आहेत. हे केंद्राकडून टेंडर घेऊन आलेले सरकार आहे. महिन्याला कितीचं टेंडर निघतं आकडा आहे माझ्याकडे, काय करणार मला परत तुरुंगात टाकाल, असे संजय राऊत यांनी म्हटले. देशातील सर्व राज्यांनी एकत्रित राहणे गरजेचे आहे. आम्ही आमच्या हक्काचीच गोष्ट करतोय, ही मानवतेची लढाई आहे. बेळगावच्या आसपास जिथं अत्याचार सुरू आहे. महाशक्तीला सांगा हिंमत असेल तर याला केंद्रशासित प्रदेश बनवा, अशी मागणी संजय राऊत यांनी केली.

कर्नाटकच्या मुख्यमंत्र्यांची एकनाथ शिंदे यांच्याशी फोनवर सामोपचाराची भाषा, अन् दुसऱ्याच क्षणाला डिवचणारं ट्विट

दिल्लीच्या पाठिंब्याशिवाय बेळगावात महाराष्ट्राच्या वाहनांवर हल्ला होऊ शकत नाही: संजय राऊत

दिल्लीचया पाठिंब्याशिवाय बेळगावात मराठी माणूस व महाराष्ट्राच्या वाहनांवर हल्ला होऊ शकत नाही.महाराष्ट्र एकीकरण समितीच्या कार्यकर्त्यांना अटक झाली आहे. महाराष्ट्राचा कणा मोडून मराठी स्वाभिमान कायमचा संपविण्याचा खेळ सुरू झालाय.बेळगावातील हल्ले त्याच कटाचा भाग आहे.ऊठ मराठ्या ऊठ, असे ट्विट संजय राऊत यांनी केले. मुख्यमंत्री शिंदे म्हणतात तीन महिन्यांपूर्वी क्रांती केली. क्रांती दिसत आहे.महाराष्ट्र इतका लेचा पेचा कधीच झाला नव्हता.स्वाभिमानी म्हणून शिवसेना सोडली असे बोलणारे आज तोंडाला कुलूप लावून बसले आहेत. हा षंढपणा आहे, असेही संजय राऊत यांनी म्हटले.
Maharashtra Karnataka: महाराष्ट्राच्या संयमालाही मर्यादा; शरद पवारांचा कर्नाटक सरकारला २४ तासांचा अल्टिमेटम

हिवाळी अधिवेशनात सीमावादाचा मुद्दा तापणार

संसदेच्या हिवाळी अधिवेशनाच्या पहिल्या दिवशी महाराष्ट्र-कर्नाटक यांच्यातील सीमावादाचे पडसाद उमटण्याची शक्यता आहे. आज संसदेत ठाकरे गटाचे खासदार आक्रमक होण्याची शक्यता आहे. तर शिंदे गटाच्या खासदारांनी केंद्रीय गृहमंत्री अमित शाह यांच्या भेटीची वेळ मागितली आहे.यावेळी ते कर्नाटक सरकारच्या दडपशाहीविरोधात तक्रार करू शकतात. त्यामुळे आता पंतप्रधान मोदी आणि अमित शाह महाराष्ट्र-कर्नाटक सीमावादात मध्यस्थी करणार का, हे पाहावे लागेल.

LEAVE A REPLY

Please enter your comment!
Please enter your name here