गांधीनगर : गुजरात विधानसभा निवडणुकीत भाजपने काँग्रेस आणि आम आदमी पक्षाला धूळ चारत ऐतिहासिक विजय साकारला आहे. आतापर्यंत हाती आलेल्या आकडेवारीनुसार १८२ जागा असलेल्या गुजरातमध्ये भाजपने तब्बल १५७ जागांवर आघाडी घेतली आहे, तर काँग्रेसला केवळ १६ जागांवर समाधान मानावं लागणार आहे. निवडणूक प्रचारात सत्तास्थापनेचा दावा करणाऱ्या अरविंद केजरीवाल यांच्या ‘आप’ला खातं उघडण्यातही यश येणार नसल्याचं आतापर्यंतच्या आकडेवारीतून दिसत आहे. त्यामुळे केजरीवाल आणि त्यांच्या टीमने केलेले सगळेच दावे फोल ठरले आहेत.

खरंतर कोणत्याही निवडणुकीला सामोरं जाताना अरविंद केजरीवाल यांच्या आम आदमी पक्षाकडून संपूर्ण शक्ती पणाला लावली जाते. तसंच या निवडणुकीत आम्हीच जिंकणार, असा दावा पक्षाचे नेते करत असतात. ‘आप’चे सर्वेसर्वा असलेले केजरीवाल हे तर अलीकडच्या काही निवडणुकांमध्ये थेट कागदावरून लिहून देत राजकीय भविष्यवाणी करत असल्याचं पाहायला मिळत आहे. पंजाब निवडणुकीवेळी केजरीवाल यांनी केलेले तीन दावे खरे ठरले होते. मात्र गुजरातमध्ये ‘आप’चंच सरकार येणार, असं लिहून देणारे केजरीवाल तोंडघशी पडले आहेत.

संसेदत अमोल कोल्हेंचा ‘आवाज’ दाबला, छत्रपती शिवरायांवर बोलायले उभे राहिले, त्यांचा माईकच बंद केला!

पंजाबमध्ये अरविंद केजरीवाल यांनी चिठ्ठीवर काय लिहून दिलं होतं?

अरविंद केजरीवाल यांच्या आम आदमी पक्षाने पंजाब विधानसभा निवडणुकीत काँग्रेस, भाजप आणि अकाली दल या पक्षांची धूळधाण उडवत ऐतिहासिक विजय मिळवला. मात्र निवडणूक निकालाआधीच केजरीवाल यांनी याबाबतचा अंदाज व्यक्त केला होता. पंजाब निवडणुकीच्या प्रचारादरम्यान एका वृत्तवाहिनीला मुलाखत देत असताना अरविंद केजरीवाल यांनी एका चिठ्ठीवर आपली निवडणूक भाकिते वर्तवली होती. यामध्ये त्यांनी लिहिलं होतं की, ‘काँग्रेसचे मुख्यमंत्रिपदाचे उमेदवार चरणजीतसिंह चन्नी हे दोन्ही विधानसभा जागांवर पराभूत होणार आहे. तर आपचे मुख्यमंत्रिपदाचे उमेदवार भगवंत मान हे विधानसभा निवडणुकीत कमीत कमी ५१ हजार मतांनी जिंकतील. अकाली दलाच्या बादल कुटुंबातील ५ जण निवडणूक मैदानात आहेत, हे पाचही उमेदवार पराभूत होणार,’ असा अंदाज अरविंद केजरीवाल यांनी व्यक्त केला होता. केजरीवाल यांचे हे सर्व अंदाज बरोबर ठरवत पंजाबमधील जनतेनं ‘आप’ला प्रचंड बहुमताने सत्तेत बसवलं.

दरम्यान, गुजरात विधानसभा निवडणुकीत मोठी वातावरणनिर्मिती करत मुख्यमंत्रिपदाचा उमेदवार घोषित केल्यानंतर एका पत्रकार परिषदेत अरविंद केजरीवाल यांनी गुजरात निवडणुकीचा अंदाज व्यक्त केला होता. आम आदमी पक्ष बहुमत मिळवत सत्ता स्थापन करणार आहे, असा विश्वास त्यांनी व्यक्त केला होता. याबाबतची आपली भविष्यवाणी त्यांनी एका चिठ्ठीवर लिहूनही दिली होती. मात्र पंजाबमध्ये तीनही अंदाज बरोबर निघालेल्या केजरीवाल यांच्या पदरी गुजरातमध्ये मात्र निराशा आली आहे. या निवडणुकीत ‘आप’चे मुख्यमंत्रिपदाचे उमेदवार इसूदान गढवी आणि पक्षाचे गुजरात प्रदेशाध्यक्ष गोपाल इटालिया यांनाही पराभवाचा धक्का सहन करावा लागला आहे.

LEAVE A REPLY

Please enter your comment!
Please enter your name here