chandrakant patil ink attack, माझ्या डोळ्याला काही वर्षांपूर्वी कॅन्सर, आता शाईफेक करून मारण्याचा प्रयत्न? चंद्रकांत पाटलांचा सवाल – bjp leader and cabinet minister chandrakant patils reaction on ink attack and ncp chhagan bhujbal

पुणे : भाजप नेते आणि राज्याचे उच्च आणि तंत्रशिक्षण मंत्री चंद्रकांत पाटील यांच्यावर शाईफेक करण्यात आल्याची घटना शनिवारी घडली. याप्रकरणी पोलिसांनी काही आरोपींना ताब्यात घेत त्यांच्यावर अनेक गंभीर गुन्हे दाखल केले आहेत. तसंच काही पोलीस अधिकाऱ्याचंही निलंबन करण्यात आलं आहे. शाईफेकीच्या घटनेबाबत चंद्रकांत पाटील यांनी आजही भाष्य केलं आहे. ‘काल झालेल्या शाईफेकीचा कट पूर्व नियोजित होता आणि याचे सर्व पुरावे मिळाले आहेत. माझ्या डोळ्याला काही वर्षांपूर्वी कॅन्सर झाला होता. त्यामुळे डोळ्याच्या आतील भागाचे मोठे ऑपरेशन करावे लागले होते. त्यावर शाई टाकली गेली. निषेध करायला हरकत नाही, पण मग मला मारण्याचा हा प्रयत्न होता का?’ असा सवाल पाटील यांनी उपस्थित केला आहे. स्पर्धा परीक्षा साहित्य संमेलनात आज चंद्रकांत पाटील हे उपस्थित होते. पाटील यांनी यावेळी माध्यमांशी संवाद साधताना शाईफेकीवर पुन्हा एकदा प्रतिक्रिया दिली आहे.

शाईफेक करणाऱ्या तरुणांवर धारदार शस्त्राने वार करत जीव घेण्याचा प्रयत्न, तसंच सरकारी कामात अडथळे आणण्याचा प्रयत्न असे अनेक गंभीर गुन्हे दाखल करण्यात आले आहेत. यावरून राष्ट्रवादीचे नेते आणि माजी मंत्री छगन भुजबळ यांनी पोलिसांच्या भूमिकेबाबत संशय व्यक्त केला होता. यावर उत्तर देताना चंद्रकांत पाटील यांनी म्हटलं आहे की, छगन भुजबळ यांना जाऊन सांगा की माझ्या डोळ्याचे ऑपरेशन झालं आहे आणि अजून भुजबळ हे जामिनावरच बाहेर आहेत हे त्यांनी विसरू नये, असा पलटवार पाटील यांनी केला आहे.

शाईफेकीचं समर्थन नाही, पण कलमं कुठली लावली? तालिबान्यासारखं वागू नका, शेट्टींनी सत्ताधाऱ्यांचे कान उपटले

शनिवारी पिंपरीत नेमकं काय घडलं?

महात्मा फुले, डॉ. बाबासाहेब आंबेडकर आणि कर्मवीर भाऊराव पाटील यांच्याविषयी चंद्रकांत पाटील यांनी पैठण येथील एका कार्यक्रमात वादग्रस्त वक्तव्य केले होते. त्याचे तीव्र पडसाद शनिवारी पिंपरी-चिंचवडमध्ये उमटले. चिंचवड देवस्थान ट्रस्ट, पिंपरी-चिंचवड महापालिका आणि ग्रामस्थांच्या वतीने आयोजित महासाधू मोरया गोसावी संजीवन समाधी महोत्सवाच्या उद्घाटनानिमित्त पाटील सायंकाळी चिंचवड येथे आले होते. माजी नगरसेवक मोरेश्वर शेडगे यांच्या निवासस्थानातून बाहेर पडत असताना एका व्यक्तीने पाटील यांना शिवी देऊन, त्यांच्या तोंडावर शाई फेकली.

अचानक घडलेल्या या प्रकारामुळे सुरक्षारक्षकांची तारांबळ उडाली. काही कार्यकर्त्यांनी सुरक्षेचे कवच करून चंद्रकांत पाटील यांना मागे घेतले. पाटील यांनीही स्वतः बचाव केला. त्यानंतर संबंधित व्यक्ती मागे फिरत असताना झटापटीत खाली पडली. त्यानंतर त्याला सुरक्षारक्षकांनी ताब्यात घेतले. घोषणाबाजी करणाऱ्या कार्यकर्त्यांनाही पोलिसांनी ताब्यात घेतले.