India lost 3rd t 20 against Australia, शेफाली वर्माच्या धडाकेबाज अर्धशतकानंतर भारताचा पराभव, टीम इंडियाने आघाडीची संधी गमावली… – ind vs aus : after shafali verma’s scintillating half-century in 3rd t 20 india lost against australia, team india missed the chance to lead in the series

ऑस्ट्रेलियाच्या १७३ धावांचा पाठलाग करताना भारताची सुरुवात चांगली झाली नाही. कारण भारताला स्मृती मानधनाच्या रुपात पहिला धक्का बसला, स्मृतीला यावेळी फक्त एकच धाव करता आली. स्मृतीनंतर फलंदाजीला आलेल्या जेमिमा रॉड्रिगेझने थोडा काळ फलंदाजी केली खरी, पण तिने ११ चेंडूंत तीन चौकारांच्या जोरावर १६ धावा केल्या. जेमिमाला यावेळी १६ धावा करता आल्या असल्या तरी तिने टी-२० क्रिकेटमध्ये १५०० धावांचा पल्ला पार केला आहे. भारताचे एकामागून एक विकेट्स पडत असल्या तरी दुसऱ्या टोकाकडून शेफाली वर्माने गोलंदाजीचा चांगलाच प्रतिकार केला. शेफालीने यावेळी ४१ चेंडूंत सहा चौकार आणि तीन षटकारांच्या जोरावर ५१ धावांची दमदार खेळी साकारली. शेफालीच्या अर्धशतकाच्या जोरावर भारतीय संघ विजयाचे स्वप्न पाहत होता. पण मोक्याच्या क्षणी ती बाद झाली. शेफाली बाद झाल्यावर कर्णधार हरमनप्रीत कौरने संघाची जबाबदारी आपल्या खांद्यावर घेतली होती. पण कौर ३७ धावांवर बाद झाली आणि सामना भारताच्या हातून निसटला.

भारताने या सामन्यात प्रथम गोलंदाजी करताना एकच धडाका उडवून दिला. कारण पहिल्याच षटकात भारताने ऑस्ट्रेलियाला पहिला धक्का देत त्यांची १ बाद २ अशी अवस्था केली. त्यानंतर दुसऱ्या षटकातही भारताने ऑस्ट्रेलियाला अजून एक धक्का दिला. त्यामुळे ऑस्ट्रेलियाची दुसऱ्या षटकात २ बाद ५ अशी स्थिती केली होती. पण त्यानंतर ऑस्ट्रेलियातची एलिस पेरी खेळायला आली आणि तिने धडाकेबाज फटकेबाजी करत ऑस्ट्रेलियाचा डाव सावरल्याचे पाहायला मिळाले. कारण पेरीने यावेळी फक्त ऑस्ट्रेलियाच्या धावसंख्येला चांगला आकार दिला आणि त्याचबरोबर संघाची धावगतीही वाढवली. पेरीने यावेळी ४७ चेंडूंत ९ चौकार आणि तीन षटकारांच्या जोरावर ७५ धावांची झुंजार खेळी साकारली. पेरीच्या या ७५ धावांच्या खेळीच्या जोरावर ऑस्ट्रेलियाला २० षटकांत ८ बाद १७२ अशी धावसंख्या उभारता आली. पेरीला यावेळी ग्रेस हॅरी (४१ धावा) आणि ब्रेथ मुनी (३० धावा) यांनी चांगली साथ दिली. त्यामुळेच ऑस्ट्रेलियाला या सामन्यात धावांचा डोंगर उभारता आला.