नववर्षाच्या शुभेच्छा देताना केतकीने सोशल मीडियावर एक पोस्ट शेअर केली आहे. तिने शेअर केलेल्या व्हिडिओमध्ये ती हातावर काढलेला एक टॅटू दाखवते आणि त्यानंतर ‘माफ करा पण कधीही विसरू नका…’ असं म्हणताना दिसते. तिने जो टॅटू काढला आहे त्यात ‘१८६/२२’ असे इंग्रजी अंकात लिहिले आहे. या पोस्टला अभिनेत्रीने भलीमोठी कॅप्शन दिली आहे. या टॅटूचा अर्थही तिने कमेंटमध्ये सांगितला.
काय आहे केतकीची कॅप्शन?
केतकीने एक विधान तिच्या कॅप्शनमध्ये शेअर केले. ती असं लिहिते की, ‘फादर, ते जे काही करत आहेत याची याबाबत त्यांना माहीत नसल्याने त्यांना माफ कर’ तिने पुढे असेही म्हटले की, ‘मी कट्टर सनातन हिंदू आहे पण याचा अर्थ असा नव्हे की बाकी सर्व १००% चुकीचे आहेत.’
अभिनेत्री पुढे लिहिते की, ‘#hatersgonnahate मुळे मी माझा द्वेष करणाऱ्यांना माफ करते, माझे ट्रोल्स हुशार नसल्याने मी त्यांना माफ करते, माझ्यावर केस करण्यासाठी ज्यांना जबरदस्ती करण्यात आली त्या सर्व लोकांना मी माफ करते, मी त्या सतत सुरू असणाऱ्या घड्याळाच्या हातालाही माफ करते. पण मी कधीच विसरत नाही आणि विसरणारही नाही. त्यामुळे लढा सुरूच राहील.’ अभिनेत्रीने #staystrong #keepfighting #stayhealthy_staygolden
असे हॅशटॅगही पोस्टमध्ये शेअर केले आहेत.
टॅटूचा काय आहे अर्थ?
अभिनेत्रीने केलेल्या पोस्टवर एकाने तिच्या टॅटूचा अर्थ विचारला. केतकीने त्याच्या पोस्टवर कमेंट करत लिहिले की, ‘हा टॅटू म्हणजे माझा अंडरट्रायल कैदी नंबर आहे. ते अंक कैदी नंबरचे आहेत. मी घड्याळ्याच्या हातांनाही माफ केले आहे. पण विसरु शकत नाही.’
४१ दिवस होती तुरुंगात
शरद पवारांवर आक्षेपार्ह टीका करणारी अभिनेत्रीची पोस्ट सोशल मीडियावर व्हायरल झाल्यानंतर तिच्या विरोधात आयपीसी कलम ५०० (मानहानी), ५०१ (मानहानिकारक मजकुर पोस्ट करणे), १५३ ए (विभिन्न समुहांमध्ये वैर वाढवण्याला प्रोत्साहन देणे) अंतर्गत गुन्हा दाखल केला होता. १५ मे रोजी तिला अटक झाली आणि ३१ मे रोजी तिला न्यायालयीन कोठडीत पाठवले गेले, दरम्यान तिला जामीन २२ जून मिळाला होता.
