बदनामी होत असल्याच्या कारणावरून चार सख्ख्या भावांनी मिळून घटस्फोटित बहिणीची मारहाण करून तिचा गळा आवळून केल्याची घटना डायघर येथे घडल्याचे समोर आले आहे. प्रतिभा म्हात्रे (२९, डायघर) हिच्या हत्येप्रकरणी चौघा भावंडांपैकी तिघांना पोलिसांनी अटक केली असून एकाचा शोध पोलिस घेत आहेत.
डायघर येथे राहणाऱ्या प्रतिभाचा विवाह २००९ साली पडलेगाव येथील प्रवीण म्हात्रेसोबत झाला होता. पण २०१०ला त्यांचा घटस्फोट झाला होता. गेल्या दहा वर्षांपासून प्रतिभा आपले आईवडील व भावंडांकडे डायघर येथे माहेरी राहत होती. प्रतिभा अधूनमधून घर सोडून जात असे. ती बीअर बारमध्येही महिला वेटर म्हणून काम करीत होती. या प्रकारामुळे गावात बदनामी होत असल्याने प्रतिभाचे भावांसोबत नेहमी भांडण होत असे. दरम्यान, प्रतिभा कोणासही न सांगता अचानक घर सोडून निघून गेली होती.
पंधरा दिवसानंतर ती घरी परतली असता तिच्या भावंडांनी तिला इतके दिवस कोठे होतीस, असा जाब विचारला. या कारणावरून चार भावंडे आणि बहिणीत कडाक्याचे भांडण झाले.त्यानंतर १ मे रोजी, रात्री प्रतिभाचा भाऊ नाथा अशोक पाटील (३१), भगवान अशोक पाटील (२४), बालाजी अशोक पाटील (२०) आणि पांडुरंग अशोक पाटील यांनी संगनमत करून तिला लोखंडी सळीने मारहाण केली. तिचा ओढणीने गळा आवळून खून केला. याप्रकरणी डायघर पोलीस ठाण्यात गुन्हा दाखल झाला असून आरोपींना अटक करण्यात आली आहे.
Maharashtra News, Latest Maharashtra News in Marathi, महाराष्ट्र ठळक बातम्या | Maharashtra Times
