love affair news, पुण्यातील ३८ वर्षीय महिलेच्या मृत्यू प्रकरणाचे गूढ उकलले; प्रियकराच्या त्रासाला कंटाळूनच… – a police investigation revealed that a 38 year old woman from pune took the extreme step because of her boyfriend

पुणे : रेल्वे गाडीसमोर उडी घेत एका ३८ वर्षीय महिलेनं आत्महत्या केल्याचा प्रकार काही दिवसांपूर्वी समोर आला होता. तारामती सूर्यवंशी (वय ३८, रा. सय्यदनगर, मूळ रा. परळी, जि.बीड) असे आत्महत्या केलेल्या महिलेचं नाव आहे. या प्रकरणात हडपसर पोलिसांनी आकस्मिक मृत्यूची नोंद केली होती. मात्र सदर महिलेच्या आत्महत्येमागील कारण आता अखेर समोर आलं असून प्रियकराच्या त्रासाला कंटाळूनच तिने आत्महत्या केल्याचं पोलीस तपासात उघड झालं आहे. हडपसर पोलिसांनी प्रियकर विक्रांत दशरथ जगताप (वय ३८, रा. फौजी निवास पाटील पार्क बायपास रोड उरळीकांचन) याला अटक केली आहे.

या घटनेबाबत पोलीस उपनिरीक्षक सुशिल डमरे यांनी फिर्याद दिली आहे. ही घटना २०१६ ते १४ जुलै २०२२ या कालावधीत घडली आहे. दरम्यान याबाबत सुरूवातीला अकस्मात मृत्यूची नोंद करण्यात आली होती. त्यानंतर तपासाअंती जगताप याच्याविरुद्ध आत्महत्येस प्रवृत्त केल्याचा गुन्हा दाखल करण्यात आल्याचे वरिष्ठ पोलीस निरीक्षक अरविंद गोकुळे यांनी सांगितले.

Pune Crime : भरधाव कारने रस्त्याने जाणाऱ्या तिघांना चिरडलं; दोघांचा जागीच मृत्यू

पोलिसांनी दिलेल्या माहितीनुसार, २०१६ पासून आरोपी विक्रांत जगताप आणि तारामती सूर्यवंशी या दोघांत प्रेमसंबध होते. तारामती या त्यांच्या कुटुंबियांना सोडून जगताप याच्यासोबत राहत होत्या. त्यांना जगताप याच्याशिवाय कोणाचाही आधार नव्हता. दरम्यान तो तारामती यांच्यासोबत सतत भांडण करून शिवीगाळ करत मारहाण करत होता. तसंच धमकीदेखील देत होता. त्यामुळे सतत होणार्‍या त्रासाला कंटाळून तारामती यांनी मांजरी परिसरातील रेल्वे रुळावर जाऊन आत्महत्या केली. सुरूवातीला याबाबत अकस्मात मृत्यूची हडपसर पोलिसांनी नोंद केली होती. मात्र तपासाअंती जगताप याने दिलेल्या त्रासाला कंटाळून तारामती यांनी आत्महत्या केल्याचे समोर आले.

दरम्यान, नातेवाईक हे तक्रार देण्यासाठी समक्ष हजर न झाल्याने पोलीस उपनिरीक्षक डमरे यांनी तक्रार दिली आहे. पुढील तपास पोलीस उपनिरीक्षक शेळके करीत आहेत.