Authored by आदित्य भवार | Edited by रोहित धामणस्कर | महाराष्ट्र टाइम्स.कॉम | Updated: 9 Jan 2023, 12:16 pm

Audi car owner slams lawyer | पुणेकरांना पत्ता विचारल्यावर काय होते, हे आपल्या सर्वांनाच माहिती आहे. पुणेकरांच्या या सुरस कथांमध्ये आता आणखी एका गोष्टीची भर पडली आहे. पुण्यातील एका ऑडी कारच्या मालकाला एका वकिलाने पत्ता विचारला. यामुळे संतापलेल्या ऑडीच्या मालकाने संबंधित वकिलाला बेदम मारहाण केली. याप्रकरणी पोलीस ठाण्यात गुन्हा दाखल झाला आहे.

 

Audi car in Pune
ऑडीचालकाची वकिलाला मारहाण

हायलाइट्स:

  • श्रीमंतीचा गर्व अनेकांना असतो
  • ऑडी चालवणाऱ्याला तू असा प्रश्न कसा विचारु शकतो
पुणे: आपल्या श्रीमंतीचा आणि ऐश्वर्याचा गर्व हा अनेकांना असतो. या गर्वातूनच अनेकदांना हिणवण्याची किंवा कमी लेखण्याचे प्रकार घडतात. आपण कोणती हाय प्रोफाइल गॅजेट्स, मोबाईल व गाड्या वापरतो यावरून लोकांची अपेक्षा असते की, आपल्याला इतरांनी आदर व दर्जाची वागणूक द्यावी. असाच काहीसा प्रकार पुण्यात घडला आहे. पुण्याच्या डेक्कन परिसरात हा प्रकार घडला आहे. याठिकाणी एका वकिलाने ऑडी कार चालवणाऱ्या व्यक्तीला पत्ता विचारला. यावरुन संबंधित व्यक्तीने वकिलाला मारहाण केली. तुला कळतं का, कोणाला काय प्रश्न विचारतो? ऑडी चालवणाऱ्याला तू असा प्रश्न कसा विचारु शकतो, असे म्हणत गाडीच्या चालकाने वकिलाला बेदम मारहाण केली.

याप्रकरणी विशाल शंकर सोनवणे (४२) यांनी डेक्कन पोलिसात तक्रार दिली आहे. मिळालेल्या माहितीनुसार, फिर्यादी यांनी डेक्कन परिसरातील उभे असताना एका व्यक्तीला ज्ञानमुद्रा टिटोरियल क्लासचा पत्ता विचारला होता. याचा राग मनात धरून ऑडी गाडी (एम एच १४ आर एफ ६६८५) चालकाने “तुम्हाला समजते का, तुम्ही कोणाला पत्ता विचारत आहात, आम्ही ऑडी चालवणारे लोक आहोत” असे म्हणून फिर्यादीला शिवीगाळ करून मारहाण केली. इतकंच काय तर त्याने कार वेगाने घेऊन जात गाडीचे चाक फिर्यादीच्या पायावरून नेले. या प्रकरणी डेक्कन पोलिस ठाण्यात गुन्हा दाखल असून, अधिक तपास पोलीस करत आहेत.

गेल्या काही दिवसांमध्ये पुणे शहर आणि ग्रामीण भागातून सातत्याने मारहाणी आणि गुन्हेगारीच्या घटना समोर येत आहेत. अगदी अल्पवयीन मुले हातात शस्त्रं घेऊन नागरिकांना धमकावत असल्याचे प्रकार समोर आले होते. पुण्यातील कोयता गँगच्या दहशतीचा मुद्दा राज्यात चांगलाच गाजला होता. याप्रकरणी पोलिसांनी तातडीने कारवाई करत आरोपींना अटक केली होती. मात्र, यानिमित्ताने पुण्यातील वाढती गुन्हेगारी हा चिंतेचा विषय पुन्हा एकदा ऐरणीवर आला आहे. कोणत्याही लहानसहान कारणावरुन होणारी भांडणे, त्यानंतर होणारी मारामारी आणि टोकाची गुन्हेगारी कृत्यं हे पोलीस यंत्रणेसाठी आव्हान ठरताना दिसत आहे.

नजरेला नजर दिली म्हणून चहाच्या टपरीवर राडा

काही दिवसांपूर्वी पुण्याच्या कदमवाक वस्तीतील एका चहाच्या टपरीवर केवळ डोळ्याला डोळा भिडवला म्हणून दोन तरुणांमध्ये भांडण झाले होते. या भांडणात एका तरुणाने दुसऱ्या तरुणावर चाकूने वार केले होते. यामध्ये हल्ला झालेला तरुण गंभीररित्या जखमी झाला होता, तर आरोपी फरार झाले होते. सध्या पोलीस या मारेकऱ्यांचा कसून शोध घेतला जात आहे.

जवळच्या शहरातील बातम्या

Marathi News App: तुम्हालाही तुमच्या अवतीभवती होत असलेल्या बदलांमध्ये सहभागी व्हायचं आहे? सिटिझन रिपोर्टर अॅप डाउनलोड करा आणि रिपोर्ट्स पाठवा.

LEAVE A REPLY

Please enter your comment!
Please enter your name here