अहमदाबाद: गुजरातच्या अहमदाबादमध्ये सेक्सटॉर्शनची एक भयंकर घटना घडली आहे. व्हिडीओ कॉलवर सेक्स करण्याच्या नावाखाली एका व्यावसायिकानं तब्बल २.८८ कोटी रुपये गमावले. एका महिलेनं तिच्या सहकाऱ्यांच्या मदतीनं व्यावसायिकाला गळाला लावलं. यासाठी महिलेचे सहकारी पोलीस, सायबर क्राईम आणि सीबीआयचे अधिकारी बनले.अहमदाबाद नवरंगपुरामध्ये राहणाऱ्या व्यावसायिकानं पोलिसांकडे तक्रार दाखल केली आहे. ८ ऑगस्ट २०२२ रोजी व्यावसायिक घरी होता. त्यावेळी त्याला रात्री मोबाईलवर हाय मेसेज आला. मेसेज करणाऱ्या तरुणीनं आपण मोरबीहून बोलत असल्याचं सांगितलं. त्यानंतर तिनं केला. तरुणीनं व्हर्च्युअल सेक्स करूया म्हणत कपडे उतरवण्यास सुरुवात केली. तिनं व्यावसायिकाला बोलण्यात फसवत त्यालाही कपडे काढायला लावले. यानंतर काही वेळातच तिनं व्हिडीओ कॉल कट केला. तरुणीनं व्हिडीओ कॉल कट केल्यानंतर पुढच्या मिनिटाला व्यावसायिकाच्या मोबाईलवर व्हिडीओ कॉलची क्लिप आली. ५० हजार रुपये दे अन्यथा क्लिप व्हायरल करू अशी धमकी देण्यात आली. बदनामीच्या भीतीनं व्यावसायिकानं ५० हजार रुपये पाठवून दिले. हे प्रकरण इथेच संपल्याचं वाटून व्यावसायिक निर्धास्त झाला. मात्र यानंतर एका अज्ञात व्यक्तीनं व्यावसायिकाला फोन केला. आपण दिल्ली पोलीस दलात निरीक्षक असल्याची बतावणी त्यानं केली. क्लिप व्हायरल करण्याची धमकी देत त्यानं ३ लाख रुपये उकळले. यानंतर एकानं दिल्ली सायबर क्राईममध्ये बोलत असल्याचं सांगून व्यावसायिकाला फोन केला. ज्या मुलीसोबत व्हिडीओ कॉलवर बोललात तिनं आत्महत्येचा प्रयत्न केल्याचं त्यानं सांगितलं. या प्रकरणातून तुमचं नाव हटवायचं असल्यास ८० लाख रुपये द्या, अशी मागणी त्यानं केली. बोगस सायबर क्राईमनंतर या प्रकरणात बोगस सीबीआयची एंट्री झाली. स्वत:ला सीबीआयचा अधिकारी म्हणत एकानं फोन केला. ज्या व्यक्तीसोबत व्हिडीओ कॉलवर बोललात, तिचे कुटुंबीय तुमच्याविरोधात तक्रार करण्यासाठी आले आहेत. तक्रार दाखल होऊ नये असं वाटत असल्यास १८ लाख रुपये द्या, अशी मागणी त्यानं केली. अशा प्रकारे बोगस अधिकाऱ्यांनी व्यावसायिकाकडून २.८८ कोटी रुपये उकळले.यानंतर व्यावसायिकानं पोलिसांकडे धाव घेतली आणि तक्रार नोंदवली. अहमदाबाद सायबर क्राईमनं तक्रार मिळाल्यानंतर पोलिसांनी मोबाईल नंबर आणि अकाऊंट नंबर तपासले. यानंतर राजस्थानच्या भरतपूरमधून एकाला अटक केली. याच व्यक्तीनं २ कोटी रुपये लाटल्याचं पोलिसांनी सांगितलं.
