Mumbai local train | सकाळी घाईगर्दीच्या वेळेत अनेकजण कामावर जाण्याच्या घाईत असतात. त्यामुळे अपघाताच्या घटना घडत असतात. अशाच एका अपघातात बोरिवली रेल्वे स्थानकात एका शिक्षिकेचा मृत्यू झाला आहे. ही शिक्षिका मालाड येथील शाळेत जात होती. त्यावेळी हा अपघात घडला. उपचारादरम्यान त्यांचा मृत्यू झाला. बाईंच्या अपघाताची माहिती कळताच शाळेतील विद्यार्थी हळहळले.
हायलाइट्स:
- बोरिवली रेल्वे स्थानकातील घटना
- ट्रेनमध्ये चढताना पडून एका शिक्षिकेचा मृत्यू झाला आहे.
पोलिसांनी तातडीनं त्यांना अॅपेक्स रुग्णालयात दाखल करून त्यांच्या नातेवाईकांना ही माहिती दिली. त्यानंतर प्रगती घरत यांना अंधेरीतील कोकिलाबेन अंबानी रुग्णालयात हलवण्यात आलं. मात्र, तिथं उपचारादरम्यान दुपारी पावणे दोनच्या सुमारास त्यांचा मृत्यू झाला. बोरिवली रेल्वे पोलिसांनी याप्रकरणात अपघाती मृत्यूची नोंद केली आहे. जेव्हा त्यांच्या मृत्यूची बातमी शाळेतील विद्यार्थ्यांना आणि राहत असलेल्या परिसरात समजली, त्यावेळी हळहळ व्यक्त करण्यात आली.
महिलांनी पाणी पाजलं, पण रुग्णालयात नेताना मृत्यू
प्रगती घरत यांना बोरिवलीत पोहोचण्यासाठी नेहमीपेक्षा थोडा उशीर झाला. त्या फलाट क्रमांक २ वर येईपर्यंत लोकल ट्रेन स्थानकातून निघाली होती. तेव्हा प्रगती घरत यांनी चालती गाडी पकण्याचा प्रयत्न केला. यावेळी त्या घसरुन खाली पडल्या आणि त्यांना जबर दुखापत झाली. रेल्वे स्थानकातील प्रवाशांनी त्यांना वर काढून बाजूला आणले. तेव्हा काही महिलांनी प्रगती घरत यांना पाणी पाजण्याचा प्रयत्न केला. त्यानंतर प्रगती घरत यांना रुग्णालयात दाखल करण्यात आले होते.
धावत्या लोकलमधून १२ वर्षांचा मुलगा खाली कोसळला
काही दिवसांपूर्वीच वांद्रे- माहिम स्थानकादरम्यान १२ वर्षांचा मुलगा लोकलमधून खाली पडल्याची दुर्घटना घडली होती. सुदैवाने तिथे असलेल्या पोलिस कर्मचाऱ्याच्या दक्षतेमुळं या मुलाला तात्काळ सायन रुग्णालयात दाखल करण्यात आले. मात्र, या मुलाला पाय गमवाला लागला होता. फरहान अन्सारी असे या मुलाचे नाव आहे. वांद्रे स्थानकापासून थोड्या अंतरावर पोलिस कॉन्सटेबल चेतन तातू हे गस्तीवर होते. त्यावेळी रेल्वे रुळांवर विव्हळत पडलेला फरहान त्यांना दिसला. फरहानचा डावा पाय मांडीपासून तुटला होता. तेव्हा चेतन यांनी फरहानला तातडीने रुग्णालयात नेले होते. तातडीने उपचार करण्यात आल्याने त्याचा जीव वाचला. परंतु, फरहानच्या पायाचे हाड आणि टिश्युला गंभीर दुखापत झाल्याने तो पुन्हा जोडता येणे शक्य नव्हते. त्यामुळे फरहानला पाय गमवावा लागला.
जवळच्या शहरातील बातम्या
Marathi News App: तुम्हालाही तुमच्या अवतीभवती होत असलेल्या बदलांमध्ये सहभागी व्हायचं आहे? सिटिझन रिपोर्टर अॅप डाउनलोड करा आणि रिपोर्ट्स पाठवा.
