चीनशी तणाव असताना पाकची चाल, लडाखजवळ लढाऊ विमानं तैनात

इस्लामाबादः पाकिस्तानने भारताविरोधात लढाईची तयारी अधिक बळकट करण्यासाठी स्कार्दू हवाई तळावर जेएफ -17 ही लढाऊ विमानं तैनात केली आहेत. एवढेच नव्हे तर पाकिस्तानने नियंत्रण रेषेजवळील चार हवाई तळांना हाय अलर्टवर ठेवले आहे. लडाखच्या अगदी जवळ असलेल्या या हवाई तळाचा वापर पाकिस्तानसह चीनचे हवाई दलही करतं. यामुळे चीनसह पाकिस्तानलाही तोंड द्यावं लागत असल्याने भारताची चिंता वाढली आहे.

पाकिस्तानच्या हवाई दलाच्या प्रमुखांची स्कार्दू तळाला भेट

पाकिस्तानी माध्यमांनी शनिवारी एक व्हिडिओ जारी केला. यात पाकिस्तानी हवाई दलाचे प्रमुख मुजाहिद अन्वर खान यांनी हवाई तळाला भेट दिली. ऑपरेशनल तयारीचा आढावा घेताना ते दिसून आले. या भागात पाकिस्तान हाय अल्टीट्यूड एअर कॉम्बेटचा सराव करत आहे. यासाठी पाकिस्तानने मोठ्या प्रमाणात लढाऊ विमानं आणि हवाई दलाचे कर्मचारी तैनात केले आहेत.

रणनीतिकदृष्ट्या महत्त्वाचे स्कार्दू विमानतळ

पाकिस्तान व्याप्त काश्मीरमधील स्कार्दू हे हवाई तळ रणनीतिकदृष्ट्या पाकिस्तानच्या हवाई दलासाठी खूप महत्त्वाचं आहे. येथून श्रीनगर आणि लेहचे अंतर केवळ २०० किलोमीटर आहे. येथून उड्डाण घेतल्यानंतर पाकिस्तानी लढाऊ विमानं अवघ्या ५ मिनिटांत भारताच्या हवाई हद्दीत प्रवेश करू शकतात. पण सीमेवर तैनात असलेली भारताची हवाई संरक्षण प्रणाली ते भेदू शकत नाही.

इंधन स्टेशन आणि शस्रास्त्रे डेपो

स्कार्दू हवाई तळावर पाकिस्तानने इंधन स्टेशन आणि शस्त्रांचे आगार बनवले आहे. हवाई तळावर भूमिगत इंधन स्टेशन आणि शस्त्रांचे डेपोही बांधले गेले आहेत. पाकिस्तानला इथून चीन-पाकिस्तान इकॉनॉमिक कॉरिडॉरवरही नजर ठेवण्याची इच्छा आहे. पाकिस्तानचे नागरी विमानतळ स्कार्दूमध्ये आधीपासूनच तयार आहे.

चिनी विमानांच्या तैनातीची शक्यता

पीओकेमधील या हवाई तळावर एअरबेस सीपीईसीच्या सुरक्षेसाठी चिनी विमानांची तैनाती होण्याची देखील शक्यता व्यक्त केली जातेय. यामुळे भारताची सुरक्षा चिंताही वाढेल. पाकिस्तानच्या प्रत्येक हालचालींवर भारतीय गुप्तचर यंत्रणा बारकाईने नजर ठेवून आहेत.