बांगलादेशला आपल्याकडे वळवण्यासाठी अमेरिका देणार मोठी भेट!

वॉशिंग्टन: आशिया खंडात आणि विशेषत: दक्षिण आशियामध्ये चीनच्या वाढत्या वर्चस्वामुळे अमेरिकेची चिता वाढली आहे. चीनकडून बांगलादेशला आपल्या बाजूने वळवण्यासाठी प्रयत्न सुरू असताना अमेरिकेनेही हालचाली सुरू केल्या आहेत. बांगलादेशला आपल्या गटात ओढण्यासाठी अमेरिका मोठा निर्णय घेण्याची शक्यता आहे.

बांगलादेशचे पहिले पंतप्रधान शेख मुजीबुर रहमान यांच्या हत्येचा आरोपी रशिद चौधरीला अमेरिका बांगलादेशला सुपूर्द करू शकतो. बांगलादेशमध्ये १९७५ मध्ये सत्तापालट करण्यात आला होता. त्यावेळी पंतप्रधान शेख मुजीबूर रहमान यांची हत्या करण्यात आली होती. या हत्याकांडातील आरोपी रशिद चौधरीने २००६ मध्ये अमेरिकेत शरणागती पत्करली होती. मात्र, अमेरिकेचे अटर्नी जनरल विलियम बार यांनी चौधरी यांच्या प्रकरणाशी निगडीत काही कागदपत्रे जून महिन्यात मागवली होती. त्यामुळेच अमेरिका आरोपी रशिद चौधरीला पुन्हा बांगलादेशकडे सोपवू शकतात अशी चर्चा आहे.

वाचा:

आरोपी रशीद चौधरीला बांगलादेशकडे सोपवण्याची मागणी शेख हसीना सरकारकडून सातत्याने करण्यात येत होती. आरोपी चौधरीवर गु्न्हा निश्चित होऊन त्याला दोषीही सिद्ध करण्यात आले आहे. बांगलादेशचे परराष्ट्र मंत्री एके अब्दुल मोमन यांनी दौऱ्यावर येणाऱ्या प्रत्येक अमेरिकन अधिकाऱ्याकडे ही मागणी केली आहे. मागील काही वर्षात बांगलादेशमधील अनेक आरोपींविरोधातील खटला संपला असून अनेकांना दोषी सिद्ध करण्यात आले आहे. त्यातील रशिद चौधरी एक हायप्रोफाइल आरोपी आहे.

वाचा:

वाचा:

बांगलादेशचे पहिले पंतप्रधान शेख मुजीबूर रहमान हे विद्यमान पंतप्रधान शेख हसीना यांचे वडील आहे. शेख मुजीबूर यांची हत्या झाली तेव्हा शेख हसीना आणि त्यांची बहीण परदेशात शिक्षणासाठी असल्यामुळे बचावल्या होत्या. तर, इतर कुटुंबीयांना ठार करण्यात आले होते.

चीनने बांगलादेशला आपल्याकडे वळवण्यासाठी अनेक सवलती, पॅकेज जाहीर केले होते. त्याशिवाय बांगलादेशमध्ये चीनने गुंतवणूकही केली आहे. भारतासोबत तणाव निर्माण झाल्यानंतर चीनने बांगलादेशमधील बहुतांशी माल करमुक्त केला होता.

वाचा:

दरम्यान, २०१९ मध्ये शेख हसीना यांनी बांगलादेशच्या पंतप्रधानपदाची दुसऱ्यांदा धुरा सांभाळल्यानंतर भारताशी संबंधित अनेक प्रकल्प धीम्यागतीने सरकत आहेत. त्याऐवजी चीनच्या पायाभूत प्रकल्पांना अतिशय महत्त्व दिले जात आहे. तर, काही दिवसांपूर्वीच पाकिस्तानचे पंतप्रधान इम्रान खान यांनी शेख हसीनांसोबत दूरध्वनीवरून चर्चा केली होती. या पार्श्वभूमीवर चीन-पाकिस्तानकडे बांगलादेश झुकत असून ट्रम्प प्रशासन चिंतेत दिसत आहे.