police murder case, पोलीस मुख्यालयातच पोलीस कर्मचाऱ्याला संपवलं; पाठीमागून शस्त्राने वार करून घेतला जीव – shocking an unknown person took the life of a police constable in the police headquarters
परभणी : पोलीस मुख्यालयातील क्वार्टरमध्येच निलंबित पोलीस शिपायाचा खून करण्यात आल्याची धक्कादायक घटना परभणीमध्ये घडली आहे. पोलिसांच्या क्वार्टरमध्ये जर खून होत असले तर सर्वसामान्य नागरिक सुरक्षित आहेत का, असा प्रश्न या घटनेनंतर उपस्थित केला जात आहे. गजानन शिवाजी पाटील (वय ३६, वर्ष) असं खून झालेल्या पोलीस शिपायाचं नाव आहे. या घटनेमुळे पोलीस दलामध्ये खळबळ उडाली असून घटनेची माहिती मिळताच वरिष्ठ पोलीस अधिकाऱ्यांनी घटनास्थळाला भेट देऊन पाहणी केली आहे.
मिळालेल्या माहितीनुसार, परभणी पोलीस दलामध्ये कार्यरत असलेल्या गजानन शिवाजी पाटील या पोलीस शिपायाचे निलंबन करण्यात आलं होतं. त्यामुळे त्यांची नेमणूक पोलीस मुख्यालय या ठिकाणी करण्यात आली होती. ते २५ जानेवारी रोजी रात्री साडेदहा वाजण्याच्या सुमारास परभणी येथील पोलीस मुख्यालयातील क्वॉर्टरमध्ये असताना त्यांच्या डोक्यामध्ये आणि छातीवर मारून अज्ञात व्यक्तीने त्यांचा खून केला. हा प्रकार उघडकीस आल्यानंतर मृत गजानन पाटील यांचा मृतदेह परभणी जिल्हा सामान्य रुग्णालयात शवविच्छेदनासाठी दाखल करण्यात आला. महाराष्ट्र हादरला! २३ वर्षीय तरुणीचे डॉक्टर होण्याचे स्वप्न भंगले, प्रेमसंबंधातून घरच्यांनीच संपवले
शवविच्छेदनाचा अहवाल आल्यानंतर याप्रकरणी दुसऱ्या दिवशी पोलीस कर्मचारी तुळशीदास देशमुख यांनी दिलेल्या फिर्यादीवरून अज्ञात आरोपीविरोधात नानलपेठ पोलीस ठाण्यामध्ये गुन्हा दाखल करण्यात आला आहे. या घटनेमुळे परभणी पोलीस दलामध्ये एकच खळबळ उडाली आहे. तर पोलीस मुख्यालयामध्येच पोलीस कर्मचाऱ्याचा खून झाला असल्याने सर्वसामान्य नागरिक सुरक्षित आहेत का, असा प्रश्न उपस्थित केला जात आहे.
दरम्यान, सदरील घटनेची माहिती मिळताच परभणीच्या पोलीस अधीक्षक आर रागसुधा यांच्यासह पोलीस दलातील इतर अधिकाऱ्यांनी घटनास्थळाला भेट देऊन पाहणी केली आहे. या घटनेचा तपास सहाय्यक पोलीस निरीक्षक शिंदे हे करत आहेत. पोलीस शिपाई गजानन पाटील यांचा खून कोणत्या कारणाने करण्यात आला हे मात्र समजू शकलेलं नाही.