माहिती अधिकार कार्यकर्ते यशवंत शिंदे यांना मारहाण करणारे पोलिस उपायुक्त अभिनाश कुमार यांच्याविरोधात माहिती अधिकार कार्यकर्ते एकवटले आहेत. उपायुक्त कुमार यांच्यावर कायदेशीर कारवाई करण्याबरोबरच घटनेचे सीसीटीव्ही फुटेज सार्वजनिक करावे, अशी या कार्यकर्त्यांची मागणी असून, त्यासाठी त्यांनी शनिवारी पोलिस आयुक्त संजय बर्वे यांची भेट घेतली. याबाबत १० जानेवारीपर्यंत अहवाल देण्यात येईल, असे आश्वासन बर्वे यांनी दिले आहे.
निवडणूक कालावधीत वरळीमध्ये सुमारे चार कोटींची रक्कम सापडली होती. या रकमेचे नेमके काय झाले याबाबत आरटीआय कार्यकर्ते यशवंत शिंदे यांनी माहिती अधिकार कायद्यांतर्गत माहिती मागवली. तसेच, पालिकेतील अनुकंपा तत्त्वावरील नोकरी बळकावल्याच्या एका प्रकरणाचीही माहिती त्यांनी आग्रीपाडा पोलिसांकडे मागितली होती. पोलिस ठाण्यांकडून देण्यात आलेल्या माहितीवर समाधान न झाल्यामुळे शिंदे यांनी अपील केले होते. अपिलावरील सुनावणीदरम्यान उपायुक्त अभिनाश कुमार यांनी केलेल्या मारहाणीमुळे शिंदे तीन दिवस रुग्णालयात दाखल होते. या घटनेनंतर आरटीआय कार्यकर्ते एकवटले आहेत.
‘मारहाण प्रकरणी चौकशी करणार’
माहिती अधिकार कार्यकर्ते यशवंत शिंदे यांना मारहाण करणारे पोलिस उपायुक्त अभिनाश कुमार यांच्याविरोधात माहिती अधिकार कार्यकर्ते एकवटले आहेत. त्यांनी शनिवारी पोलिस आयुक्त संजय बर्वे यांची भेट घेतली. माजी केंद्रीय माहिती आयुक्त शैलेश गांधी, पद्मश्री सुचेता दलाल, अनिल गलगली, भास्कर प्रभू, जीआर वोरा, डॉल्फि डिसोझा आणि तक्रारदार यशवंत शिंदे यांचा या शिष्टमंडळात समावेश होता. या प्रकरणी १० जानेवारीपर्यंत चौकशी केली जाईल, असे आश्वासन आयुक्तांनी दिले.
आयुक्त बर्वे यांनी सर्व घटनाक्रम जाणून घेतला आणि आरटीआय कार्यकर्त्यांनी दिलेले निवेदनही स्वीकारले. यावेळी गुन्हे शाखेचे पोलिस सहआयुक्त संतोष रस्तोगी उपस्थित होते. दालनात सीसीटीव्ही नसल्याने तेथील फुटेज देण्याचा प्रश्न उद्भवत नाही, पण बाहेरील सीसीटीव्ही फुटेज उपलब्ध करून देण्यात येईल, असेही आयुक्त म्हणाल्याचे आरटीआय कार्यकर्त्यांनी सांगितले.
Maharashtra News, Latest Maharashtra News in Marathi, महाराष्ट्र ठळक बातम्या | Maharashtra Times
