सॅल्यूट! करोनाला हरवल्यानंतर मुंबई पोलिसांचे प्लाझ्मा दान, निर्माण केला आदर्श

मुंबईः करोना संकटात नागरिकांच्या सुरक्षेसाठी पोलिस सदैव तत्पर आहेत. करोनाच्या या लढाईत योद्धे असलेल्या पोलिसांनी नागरिकांच्या सुरक्षेत जीवाची बाजी लावली आहे. या काही जणांना करोनाची लागण झाली. त्यातून ते बरे झाले. आता त्यांनी अडचणीत आलेल्या करोना रुग्णांसाठी आपला प्लाझ्मा दान करत जनतेसमोर आणखी एक आदर्श निर्माण केला आहे.

कोरोना रूग्णांना लढण्यासाठी पोलिसांनी आपल्या रक्तातील प्लाझ्मा दान केले आहे. या कोरोना योद्धांमध्ये स्वत: अपर पोलिस आयुक्त, मध्य प्रादेशिक विभागाचे विरेश प्रभू, तसेच शाहूनगर पोलिस स्टेशनचे वरीष्ठ पोलिस निरीक्षक विलास गंगावणे, सागर शिंत्रे यांच्यासह इतकर पोलिसांनी प्लाझ्मा दान करून महादानाच्या प्रकल्पाची सुरूवात केली.

कोव्हिडचा बरा झालेला पेशंट कोरोनाची लागण झालेल्या दुसऱ्या पेशंटला बरं करू शकतो? जगातल्या अनेक देशांमध्ये याप्रकारे रुग्णांवर उपचार सुरू झालाय. याला प्लाझ्मा थेरपी असं म्हणतात. कोरोना विषाणूला हरवून जी व्यक्ती बरी झाली आहे. त्या व्यक्तीच्या रक्तातील प्लाझ्माने आता इतर रुग्णांचे जीव वाचू शकतात. एखादा विषाणू शरीरात शिरला की आपलं शरीर त्याला हुसकावून लावण्यासाठी जोरदार प्रयत्न करतं. विषाणू आणि आपल्यात होणाऱ्या या लढाईत आपले सैनिक असतात ते अँटिबॉडीज. एका विशिष्ट विषाणूला मारण्यासाठी आपलं शरीर विशिष्ट प्रकारच्या अँटीबॉडीज तयार करतं. या अँटीबॉडीज आपल्या रक्तातल्या प्लाझ्मामध्ये असतात. कोव्हिडमधून बऱ्या झालेल्या व्यक्तीच्या शरीरात कोरोनाशी लढू शकणाऱ्या अँटीबॉडीज मुबलक असतात. त्या काढून कोरोनाशी लढणाऱ्या एखाद्या गंभीर प्रकृती झालेल्या रुग्णाच्या शरीरात सोडल्या तर व्यक्तीचं शरीर कोरोनाशी चांगल्या पद्धतीनं दोन हात करू शकतं.

मुंबईतील धारावी आणि शाहूनगर भागातील पोलिसांनी ताबडतोब रक्तदान केले. आता मुंबईतील अनेक पोलिसांनी प्लाझ्मा दान करण्यासाठी इच्छा व्यक्त केली आहे. याबाबतची सुरुवात सेंट्रल रिजनमधून झाली आहे. रक्तातला प्लाझ्मा वेगळा काढून त्यावर अभ्यास सुरू आहे. हाच प्लाझ्मा आता इतर कोव्हिड रुग्णांचे जीव वाचवू शकणार आहे. करोनामुक्त झालेल्या धारावीकरांनी पुढे येऊन आपला प्लाझ्मा दान करावा, असं आवाहन पोलिसांनी केलं आहे.