औरंगाबादमध्ये करोनाने आणखी बळी घेतले, एकूण मृतांचा आकडा….

म. टा. प्रतिनिधी, औरंगाबादः जिल्ह्यातील ४० ते ७० वयोगटातील सहा, तर बीड जिल्ह्यातील खामखेड येथील ६५ वर्षीय रुग्णाचा उपचारादरम्यान शासकीय वैद्यकीय महाविद्यालय व रुग्णालय (घाटी) तसेच खासगी रुग्णालयात मृत्यू झाला. त्यामुळे जिल्ह्यातील एकूण करोना बळींची संख्या ४४९ झाली आहे. त्याचवेळी जिल्ह्यात सोमवारी (२७ जुलै) दुपारपर्यंत करोनाबाधितांची संख्या १३,१०५ झाली आहे.

सिल्कमिल कॉलनीतील ४० वर्षीय पुरुष रुग्णाला १३ जुलै रोजी घाटीत दाखल केले होते व दुसऱया दिवशी प्राप्त झालेल्या अहवालानुसार रुग्ण बाधित असल्याचे स्पष्ट झाले असतानाच रुग्णाचा रविवारी (२६ जुलै) दुपारी अडीच वाजता मृत्यू झाला. बीड येथील खामखेड येथील ६५ वर्षीय पुरुष रुग्णाला २४ जुलै रोजी घाटीत दाखल केले व दुसऱया दिवशी प्राप्त झालेल्या स्वॅब रिपोर्टनुसार रुग्ण बाधित असल्याचे स्पष्ट झाले होते. उपचारादरम्यान रुग्णाचा रविवारी सायंकाळी सव्वापाचला मृत्यू झाला. जटवाडा परिसरातील राहत पटी तांडा येथील ५२ वर्षीय पुरुष रुग्णाला १७ जुलै रोजी घाटीत दाखल केले होते व त्याचदिवशी प्राप्त झालेल्या अहवालानुसार रुग्ण करोनाबाधित असल्याचे स्पष्ट झाले होते. उपचार सुरू असताना रुग्णाचा रविवारी रात्री ११ वाजता मृत्यू झाला. पुंडलिक नगर (गल्ली क्रमांक ७) येथील ५४ वर्षीय पुरुष रुग्णाला १७ जुलै रोजी घाटीत दाखल केले होते व दुसऱया दिवशी प्राप्त झालेल्या अहवालानुसार रुग्ण बाधित असल्याचे निदान झाले होते.

उपचारादरम्यान रुग्णाचा रविवारी मध्यरात्री पावणे तीन वाजता मृत्यू झाला. भावसिंगपुरा येथील ५२ वर्षीय पुरुष रुग्णाला १९ जुलै रोजी घाटीत दाखल केले होते व त्यापूर्वीच रुग्ण बाधित असल्याचे निदान झाले होते. उपचारादरम्यान रुग्णाचा सोमवारी पहाटे पावणे पाच वाजता मृत्यू झाला. जयभवानी नगर येथील ७० वर्षीय महिला रुग्णाला १८ जुलै रोजी घाटीत दाखल केले होते व त्याचदिवशी रुग्ण बाधित असल्याचे स्पष्ट झाले होते. उपचार सुरू असताना रुग्णाचा रविवारी सायंकाळी पाच वाजता मृत्यू झाला. त्याचवेळी सिल्लोडमधील डॉ. झाकीर हुसेन नगरातील ५० वर्षीय करोनाबाधित पुरूष रुग्णाचा शहरातील खासगी रुग्णालयात मृत्यू झाला. त्यामुळे आतापर्यंत घाटीमध्ये ३४२, तर जिल्ह्यात ४४९ बाधितांचा मृत्यू झाल्याचे जिल्हा प्रशासनाकडून कळवण्यात आले आहे.