सेन्सेक्स वधारला ; शेअर बाजारात धडकली तेजीची लाट

मुंबई : जगभरात करोना रुग्णांची संख्या झपाट्याने वाढत आहे. त्यातच अमेरिका आणि भारतात करोनाचा मोठा प्रभाव आहे. करोनावर लस संशोधन अंतिम टप्प्यात आहे. विविध देशांत लसीची चाचणी अंतिम टप्प्यात असल्यानं त्याबाबत आशेचा किरण निर्मण झाला आहे. दरम्यान, अमेरिकेच्या सिनेटने अमेरिकन अर्थव्यवस्थेसाठी आर्थिक पॅकेज देण्यास अनुकूलता दर्शवली असल्याने जागतिक गुंतवणूकदारांमध्ये सकारात्मक वातावरण निर्माण झाले असल्याचे शेअर दलालांनी सांगितले.

सोमवारी अमेरिकन शेअर बाजार तेजीसह बंद झाले होते. त्यापाठोपाठ आज आशियातील जपान, सिंगापूर, हॉंगकॉंग, चीन येथील प्रमुख भांडवली बाजारांमध्ये तेजी दिसून आली. सिंगापूर एक्सचेंजचा निफ्टी ७६ अंकांनी वधरला होता. तर हाँगकाँगचा हँगसेंग ३३९ अंकांनी वाढला. जागतिक बाजारात आज खनिज तेलाच्या किमतीत ३५ सेंट्सची वाढ झाली. खनिज तेलाचा भाव ४३.७६ डॉलर प्रती बॅरल झाला.

आज नेस्ले, आयडीबीआय बँक, अल्ट्राटेक सिमेंट अशा महत्वाच्या कंपन्यांचे तिमाही निकाल जाहीर होणार आहेत. त्याशिवाय महिंद्रा फायनान्सचा राईट ईश्यु आज खुला होणार आहे. याबाबत गुंतवणूकदारांमध्ये उत्सुकता आहे. सध्या सेन्सेक्स १४२ अंकांच्या वाढीसह ३८०७७ अंकांवर आहे. निफ्टीमध्ये ६३ अंकांची वाढ झाली असून तो १११९५ अंकांवर ट्रेड करत आहे.

शेअर बाजाराच्या माहितीनुसार स्थानिक संस्थात्मक गुंतवणूकदारांनी सोमवारी बाजारात ९७८ कोटींचे शेअर विक्री केले. सध्या बाजारात टाटा मोटर्स, एसबीआय, महिंद्रा फायनान्शिअल, रिलायन्स इंडस्ट्रीज, एक्सीस बँक, एनटीपीसी, सन फार्मा, नेस्ले, ओएनजीसी आदी शेअर तेजीत आहेत. आयटीसी, भारतीएअरटेल, महिंद्रा अँड महिंद्रा, इन्फोसिस, एचसीएल टेक या शेअरवर दबाव आहे.

देशातील एकूण करोनाबाधित रुग्णांपैकी आतापर्यंत एकूण ३३,४२५ रुग्णांचा मृत्यू झाल असल्याचे केंद्रीय आरोग्य मंत्रालयाने म्हटलं आहे. सध्या अमेरिका आणि चीन यांच्यामध्ये कुरघोडी सुरु आहे. अशा स्थितीत जागतिक भांडवली बाजारातील अनिश्चितता वाढली आहे. दोन्ही देशांनी एकमेकांचे दूतावास बंद करण्याचा निर्णय घेतला आहे.

करोनाच्या संसर्गाला अटकाव करण्यासाठी लस विकसित करण्यासाठी प्रयत्न सुरू असताना दुसरीकडे मोठी दिलासादायक बातमी समोर आली आहे. करोनाच्या विषाणूंची संख्या वाढू न देणाऱ्या, त्यांच्या संख्येवर अटकाव करणाऱ्या २१ औषधांची ओळख पटवण्यास संशोधकांना यश आले आहे. या संशोधनात अनेक संशोधकांचा सहभाग होता. यामध्ये काही भारतीय वंशाच्या डॉक्टरांचाही समावेश आहे.