करोना: अहमदनगर जिल्ह्यानं वाढवली महाराष्ट्राची चिंता

अहमदनगर: सुरुवातीपासून करोनाचा प्रसार नियंत्रणात ठेवण्यात यश आलेल्या अहमदनगरची स्थिती गेल्या दोन आठवड्यांत कमालीची खालावली आहे. रुग्णवाढीचा टक्का १०.१ वर गेला असून या बाबतीत देशातील टॉपच्या अकरा जिल्ह्यांत अहमदनगरचा समावेश झाला आहे. या यादीत झळकलेला राज्यातील हा एकमेव जिल्हा आहे.

देशाच्या आरोग्य यंत्रणेच्या एका अहवालात ही माहिती देण्यात आली आहे. गेल्या दोन आठवड्यांत परिस्थिती सुधारत असलेले जिल्हे आणि परिस्थिती बिघडत असलेल्यांची यादी करण्यात आली आहे. परिस्थिती सुधारत अससेल्यांमध्ये महाराष्ट्रातून मंबईचा समावेश झाला आहे. तर परिस्थिती बिघडत असलेल्या जिल्ह्यांत अहमदनगरचा समावेश झाला आहे.

हेही वाचा:

देशातील सुमारे दोनशे जिल्ह्यांत रुग्णसंख्या एक हजाराच्या पुढे आहे. त्यातील ज्या जिल्ह्यांत नव्याने रुग्णसंख्या कमालीची वाढत आहे, त्यातील ११ जिल्ह्यांची यादी तयार करण्यात आली आहे. यामध्ये आंध्रप्रदेशातील पूर्व गोदावरी जिल्हा प्रथम क्रमांकावर असून तेथे १२.३ टक्के वाढ नोंदली गेली आहे. तर नगरचा अकरावा क्रमांक असून येथे १०.१ टक्के वाढ आहे. या यादीत आंध्रप्रदेशातील ५, कर्नाटकातील २ तर केरळ, बिहार, झारखंड व महाराष्ट्रातील प्रत्येकी एका जिल्ह्याच्या समावेश आहे.

नगरला पहिला रुग्ण १२ मार्चला आढळला. सुरवातीपासून दक्षता घेण्यात येत असल्याने परिस्थिती नियंत्रणात होती. पहिल्या तीन महिन्यांत वाढीचा वेग खूपच कमी होता. मात्र, जुलै महिन्यात गेल्या दोन आठवड्यांत हा वेग कमालीचा वाढला. दररोज तीन अंकी रुग्ण सापडू लागले. इतर शहरांच्या आणि एकूण लोकसंख्येच्या तुलनेत हे प्रमाण कमी दिसत असले तरी वाढ मात्र चिंताजनक आहे. वाढीचा टक्का दोन अंकी असलेल्या यादीत नगरचा समावेश झाला. सध्या नगर जिल्ह्यात ३८१७ एकूण रुग्णांची नोंद आहे. त्यातील २४१८ बरे होऊन घरी परतले आहेत. १३५६ रुग्णांवर उपचार सुरू असून ५३ मृत्यंची नोंद झाली आहे.

हेही वाचा:

लॉकडाउनमध्ये शिथील दिल्यानंतर संख्या वाढत असल्याचे आढळून आले. पूर्वी बाहेरच्या जिल्ह्यातून आलेले किंवा बाहेर जाऊन आलेले रुग्ण आढळून येत असत. आता स्थानिक पातळीवरच लागण होत असल्याचे आढळून येत असून कुटुंबाच्या कुटुंब बाधित झाल्याचे आढळून येत आहे. खासगी लॅब आणि कोव्हिड सेंटरची संख्या वाढली, चाचण्यांचे प्रमाणही वाढले आहे.