पुणे : शेतीसह अवजड कामांसाठी सहजपणे वापरल्या जाणाऱ्या कोयत्यांचा दहशती पसरवण्यासाठी वापर होत असल्याने कोयत्याच्या सरसकट विक्रीवर बंधने घालण्यात आली आहेत. शहरातील कोयता गँगची दहशत मोडून काढण्यासाठी कोयता खरेदी करणाऱ्या नागरिकांकडून आधार कार्ड घेण्याची सक्ती करण्यात आली आहे. कोयता खरेदी करणाऱ्याचे नाव आणि पत्ता नोंदवून घेण्याचे आदेश पोलिसांनी दिले आहेत.किरकोळ वादातून कोयते उगारून दहशत पसरविण्याच्या घटना शहरात रोज घडत आहेत. चोरी, दहशत, जुनी भांडणे अशा गुन्ह्यांत कोयत्यांचा वापर होत आहे. निरपराध नागरिकांवर दिवसाढवळ्या कोयत्याने वार केले जात असल्याच्या घटना घडत असल्याने नागरिकांमध्ये भीतीचे वातावरण पसरले आहे. कोयतेधारी टोळक्याच्या उच्छादामुळे व्यापारी चिंतेत आहेत. या पार्श्वभूमीवर पोलिसांनी टोळक्यांचा बंदोबस्त करतानाच त्यांना मिळणारी रसद थांबविण्यासाठी कोयत्याच्या सरसकट विक्रीवर बंधन घालण्यात आले आहे.गुन्हे शाखेने बोहरी आळीतून १३५ कोयते जप्त केले होते. त्यानंतर अनेक ठिकाणी कोयते सहज उपलब्ध असल्याने त्याचा दहशतीसाठी होणारा वापर टाळण्यासाठी पोलिसांनी ही क्लृप्ती शोधली आहे. अल्पवयीन मुलांना कोयते सहज उपलब्ध होत असल्याने कोयता खरेदीसाठी आलेल्या नागरिकांकडून आधारकार्ड घ्यावे तसेच त्याचे नाव आणि पत्ता नोंदवून घ्यावा, असे आदेश पोलिसांनी दिले आहेत.अल्पवयीन मुलांच्या टोळक्याने मुलीच्या कारणावरून अल्पवयीन मुलावर वार केल्याची घटना बाजीराव रस्त्यावर नूतन मराठी विद्यालयासमोर घडली. या घटनेत ‘नूमवि’तील १७ वर्षीय विद्यार्थी गंभीर जखमी झाला आहे. सात अल्पवयीन मुलांना ताब्यात घेण्यात आले आहे. या प्रकरणानंतर कोयतेधारी टोळके आणि त्यातील अल्पवयीन मुलांचा सहभाग यामुळे वाढत्या गुन्हेगारीला आळा बसवण्याबरोबरच या मुलांना योग्य मार्गावर आणण्याचे आव्हान पोलिसांसमोर निर्माण झाले आहे.कोयता गँगला पकडा; बक्षीस मिळवाशहरात धुमाकूळ घातलेल्या कोयता गँगला आवरण्यासाठी गुंडांना पकडा आणि रोख बक्षीस मिळवा, अशी योजना पोलिसांनी जाहीर केली आहे. या गुंडांना पकडणाऱ्या पोलिसांना दहा हजार रुपयांपर्यंत बक्षीस देण्यात येणार आहे. कोयता गँगचा बिमोड करण्यासाठी पोलिसांनी कारवाई सुरू केली आहे.कोयता गँगमधील अनेक मुले अल्पवयीन असल्याने त्यांच्यावर बाल गुन्हेगारी प्रतिबंधक कायद्यातील तरतुदींचा वापर करण्यात येत आहे. बेकायदा शस्त्र बाळगणाऱ्या सराईतांना पकडल्यास दहा हजार रुपयांचे बक्षीस, शस्त्र अधिनियमानुसार कारवाई केल्यास तीन हजार रुपयांचे बक्षीस, फरार आरोपीला पकडल्यास दहा हजार रुपयांचे बक्षीस, महाराष्ट्र संघटित गुन्हेगारी नियंत्रण कायद्यान्वये (मकोका) कारवाई करून गुंडाला पकडल्यास पाच हजार रुपयांचे बक्षीस, विघातक कृत्य करण्याच्या तयारीत असलेल्या सराईताला पकडल्यास पाच हजार रुपयांचे बक्षीस तसेच महाराष्ट्र पोलिस कायद्यान्वये कारवाई केल्यास दोन आणि एक हजार रुपयांचे बक्षीस देण्यात येणार आहे. पोलिस आयुक्त रितेशकुमार यांच्या मार्गदर्शनाखाली अतिरिक्त पोलिस आयुक्त राजेंद्र डहाळे आणि रंजनकुमार शर्मा यांनी ही योजना सुरू केली आहे.रिक्षातून अठरा कोयते जप्तविक्रीसाठी आणलेले अठरा कोयते रिक्षातून जप्त करण्यात आले. अवैधरित्या कोयते बाळगणाच्या दोन गुन्हेगारांना मार्केटयार्ड पोलिसांनी पोलिसांनी अटक केली. भवरसिंग भुरसिंग भादा (वय ३५) आणि गणेशसिंग हुमनसिंग टाक (वय ३२, दोघे रा. येरवडा), अशी अटक करण्यात आलेल्या आरोपींची नावे आहेत. दोन जण अवैधपणे कोयते बाळगून असल्याची माहिती मार्केट यार्ड पोलिस ठाण्याच्या पथकाला मिळाली. मार्केट यार्ड आंबेडकरनगर रिक्षा स्टँडजवळ सापळा रचून आरोपींना ताब्यात घेण्यात आले. त्यांच्याकडून १८ कोयते आणि एक रिक्षा जप्त करण्यात आली. मार्केट यार्ड पोलिस ठाण्याच्या वरिष्ठ पोलिस निरीक्षक ए. व्ही. देशपांडे आणि पोलिस निरीक्षक (गुन्हे) सविता ढमढेरे यांच्या पथकाने ही कारवाई केली.शहरातील कोयतेधारी टोळक्यांची दहशत मोडून काढण्यासाठी कारवाई करण्यात येत आहे. या गुन्ह्यांतील अल्पवयीन मुलांच्या मागे कोणते गुन्हेगार पडद्यामागून कार्यरत आहेत का, याचा तपास करण्यात येत आहे. कायदा आणि सुव्यवस्थेच्या दृष्टीने शहरात लवकरच सकारात्मक बदल दिसतील.- रितेशकुमार, पोलिस आयुक्त
