Nashik Graduates constituency Election results | नाशिक पदवीधर मतदारसंघात सत्यजीत तांबे यांनी मविआच्या शुभांगी पाटील यांच्यावर मोठ्या मताधिक्याने विजय मिळवला. काँग्रेसचा पाठिंबा नसूनही तांबे पितापुत्रांनी विजय मिळवून नाशिकमधील आपली ताकद सिद्ध केली.
हायलाइट्स:
- नागपूरमध्ये मिळालेल्या विजय हा एखाद्या नेत्याचा नव्हे
- नागपूरमधील विजय हा काँग्रेसच्या कार्यकर्त्यांचे यश
- सत्यजीत तांबे यांना परत घेण्याचा प्रश्नच येत नाही
Explainer: सत्यजीत तांबेंनी नाशिकचं मैदान मारलं, पटोलेंनी नागपूरचा बालेकिल्ला जिंकला, पण काँग्रेसचं काय होणार?यावेळी नाना पटोले यांना नाशिक पदवीधर निवडणुकीबाबत आणि पर्यायाने सत्यजीत तांबे यांच्याबाबत विचारणा करण्यात आली. यावर नाना पटोले यांनी म्हटले की, ‘सत्यजीत तांबे यांच्या बंडखोरीनंतर माझे बाळासाहेब थोरात यांच्याशी काहीही बोलणे झालेले नाही. तसेच सत्यजीत तांबे यांना पुन्हा काँग्रेसमध्ये घेणार का, असा प्रश्नही पटोले यांना विचारण्यात आला. त्यावर पटोले यांनी म्हटले की, सत्यजीतला आता परत घेण्याचा प्रश्नच येत नाही. कारण, निलंबनाचा निर्णय हायकमांडने घेतल्याचे पटोले यांनी सांगितले. त्यामुळे सत्यजीत तांबे यांनी नाशिकमध्ये आपली ताकद दाखवूनही नाना पटोले यांचा बाणा अद्याप कायम असल्याचे दिसत आहे. आज सकाळीच नाना पटोले यांनी सत्यजीत तांबे यांचा निर्णय हायकमांड घेईल, असे म्हटले होते. त्यामुळे तांबे यांच्या घरवापसीच्या आशा पल्लवित झाल्या होत्या. परंतु, संध्याकाळपर्यंत नाना पटोले यांनी नवे विधान करुन या आशा धुळीस मिळवल्या आहेत.
Nashik Election: सत्यजीत तांबेंना निवडणुकीत राष्ट्रवादीकडून छुपी रसद? शरद पवारांची महत्त्वाची भूमिका
तांबे पितापुत्रांच्या निलंबनात पटोलेंची महत्त्वाची भूमिका
डॉ. सुधीर तांबे यांनी नाशिक पदवीधर मतदारसंघात काँग्रेसकडून उमेदवारी जाहीर होऊनही अर्ज भरला नव्हता. त्यांच्याऐवजी सत्यजीत तांबे यांनी अपक्ष उमेदवारी अर्ज भरला होता. तांबे पितापुत्रांच्या या खेळीमुळे नाशिकच्या राजकारणात एकच खळबळ उडाली होती. नाना पटोले यांनी तातडीने समोर येत नाशिक पदवीधरमध्ये सत्यजीत तांबेंना काँग्रेसचा पाठिंबा मिळणार नाही, असे जाहीर करुन टाकले होते. तसेच डॉ. सुधीर तांबे आणि सत्यजीत तांबे यांच्यावर निलंबनाची कारवाई करण्यातही नाना पटोले यांनी पुढाकार घेतला होता. या माध्यमातून नाना पटोले यांनी सत्यजीत तांबे यांचे मामा आणि काँग्रेसचे ज्येष्ठ नेते बाळासाहेब थोरात यांना शह देण्याचा प्रयत्न केल्याची चर्चा होती. परंतु नाशिकमधील सत्यजीत यांच्या विजयामुळे तांबे-थोरात यांनी आपली ताकद सिद्ध केली आहे. तरीही काँग्रेसमधील आपल्याच सहाकाऱ्यांशी फटकून वागत असल्याचा आरोप असणाऱ्या नाना पटोले यांच्या वर्तनात कोणताही फरक पडलेला नाही.
जवळच्या शहरातील बातम्या
Marathi News App: तुम्हालाही तुमच्या अवतीभवती होत असलेल्या बदलांमध्ये सहभागी व्हायचं आहे? सिटिझन रिपोर्टर अॅप डाउनलोड करा आणि रिपोर्ट्स पाठवा.
