दागिन्यांवर'हॉलमार्किंग'; वर्षभर मुदतवाढ देण्याची सराफांची मागणी

वृत्तसंस्था, मुंबई : करोनामुळे सर्वच उद्योगांवर संकट आले असताना त्यातून दागिने उद्योगही सुटलेला नाही. त्यातच ग्राहकांची कोणत्याही प्रकारे फसवणूक होऊ नये, म्हणून सरकारने प्रत्येक दागिन्यावर हॉलमार्क असावा असा आग्रह धरला आहे. करोनाच्या पार्श्वभूमीवर, या हॉलमार्किंगला सरकारने १ जून २०२१ पर्यंत मुदतवाढ दिली आहे. ही मुदतवाढ पुरेशी नसून ती २०२२ पर्यंत वाढवावी, अशी मागणी ऑल इंडिया जेम अॅण्ड ज्वेलरी डोमेस्टिक कौन्सिलचे अध्यक्ष अनंत पद्मनाभन यांनी केली आहे.

यासंदर्भात पद्मनाभन म्हणाले की, सध्या सणासुदीचे दिवस असूनही करोनामुळे दागिन्यांची विक्री जवळजवळ शून्यावर आली आहे. सराफांकडे असलेले दागिने विकल्याखेरीज नवे हाॅलमार्कचे दागिने विक्रीसाठी ठेवणे प्रत्येक सराफाला शक्य होणार नाही. त्यामुळे कौन्सिलने अन्य सराफ संघटनांना सोबत घेऊन केंद्र सरकारला निवेदन देण्याचे ठरवले आहे.

यावर्षी सप्टेंबर महिन्यात एकूण दागिन्यांच्या साठ्यापैकी ७० ते ८० टक्के साठ्याची जागा हॉलमार्कचे दागिने घेतील, अशी आशाही पद्मनाभन यांनी व्यक्त केली आहे. मात्र सध्याचा विक्रीचा वेग पाहता सराफांना आधीचा साठा काढून टाकण्यास वर्षभराहून अधिक कालावधी लागण्याची दाट शक्यता आहे. या पार्श्वभूमीवर केंद्रीय ग्राहक व्यवहारमंत्री रामविलास पासवान यांनी १ जून २०२१ पर्यंत हॉलमार्किंगला मुदतवाढ देण्याचा निर्णय सराफांशी चर्चा करूनच घेण्यात आल्याचे सांगितले आहे. यापूर्वी यासाठी अंतिम मुदत १५ जानेवारी २०२१ ही होती.

वर्ल्ड गोल्ड कौन्सिलचे व्यवस्थापकीय संचालक सोमसुंदरम पीआर यांच्या मते, सरकारने सध्या दिलेली १ जून २०२१ पर्यंतची मुदत पुरेशी असली तरी, करोनाचे सातत्याने वाढते संकट पाहता, ही मुदत वाढवणे श्रेयस्कर ठरेल.

हॉलमार्किंगची स्थिती

– १ जून २०२१ पासून सराफांना केवळ १४, १८ व २२ कॅरेट सोन्याचे दागिनेच विकता येणार.

– आतापर्यंत ब्युरो ऑफ इंडियन स्टॅण्डर्डकडे फक्त २८,८४९ सराफांनीच हॉलमार्किंगसाठी केली आहे नोंदणी.

– सध्या बाजारात विकल्या जात असलेल्या सोन्याच्या दागिन्यांपैकी केवळ ४० टक्के दागिनेच हॉलमार्कसह विकले जात आहेत.