याबाबत राहुल कलाटे म्हणाले की, सचिन आहिर आणि माझी सविस्तर चर्चा झाली. सचिन भाऊंनी उद्धव साहेबांशी देखील बोलणं करुन दिलं. माझी साहेबांशी देखील चर्चा झाली आहे. उद्धव साहेबांचा कुठल्याही प्रकारचा अनादर करण्याचा माझा प्रयत्न नाही. परंतु आधी मी माझ्या सर्व कार्यकर्त्यांशी चर्चा करतो. कारण त्यांनी आजपर्यंत मला पाठबळ दिलंय. त्यानंतर मी माझा निर्णय कळवतो, अशी प्रतिक्रिया राहुल कलाटे यांनी दिली.यामुळे कलाटे अर्ज मागे घेतील की नाही यावर आता चर्चा रंगू लागली आहे. कारण महविकास आघाडीकडून नाना काटे यांना उमेदवारी मिळाली असतानाही कलाटे यांनी अपक्ष म्हणून उमेदवारी आर्ज दाखल केला आहे. आज अर्ज माघारी घेण्याची शेवटची तारीख असल्याने राजकीय घडामोडींना वेग आला आहे. कलाटे यांच्या या भूमिकेने सस्पेन्स आणखी वाढला आहे.
Kasba bypoll: पुण्यात ठाकरे गटाची डोकेदुखी वाढली, कसब्यात मोठा पदाधिकारी राजीनामा देण्याच्या तयारीत
चिंचवड पोटनिवडणुकीची घोषणा झाल्यापासून राहुल कलाटे हे उमेदवारीचे प्रबळ दावेदार मानले जात होते. २०१९ च्या निवडणुकीत राहुल कलाटे यांची चिंचवडमधील कामगिरी लक्षणीय होती, त्यांना एक लाखांहून अधिक मतं पडली होती. त्यामुळे पोटनिवडणूक जाहीर झाल्यापासून राहुल कलाटे यांनी लढण्याची तयारी सुरु केली होती. 
Kasba Bypoll: राहुल गांधींचा एक फोन आला अन् कसब्यातील काँग्रेसच्या बंडखोर उमेदवाराची माघार
शिवसेना नेते (ठाकरे गट) संजय राऊत यांनीदेखील चिंचवडची जागा आमच्या वाट्याला यावी, अशी इच्छा व्यक्त केली होती. परंतु, नंतर महाविकास आघाडीच्या बैठकीत चिंचवडमधून राष्ट्रवादी काँग्रेसचा उमेदवार उभा राहणार, असा निर्णय झाला. त्यानुसार अजित पवार यांच्या खास मर्जीतील असलेल्या नाना काटे यांना उमेदवारी जाहीर झाली. त्यामुळे नाराज झालेल्या राहुल कलाटे यांनी अपक्ष उमेदवारी अर्ज दाखल केला होता. सुरुवातीला मविआच्या नेत्यांना आपण राहुल कलाटे यांची समजूत काढू, असे वाटले होते. परंतु, काही केल्या राहुल कलाटे माघार घ्यायला तयार नसल्याने गेल्या दोन दिवसांपासून उद्धव ठाकरे यांच्या माध्यमातून राहुल कलाटे यांच्यावर उमेदवारी मागे घेण्यासाठी दबाव टाकला जात आहे. परंतु, अद्याप राहुल कलाटे कोणत्याही दबावापुढे झुकलेले नाहीत. आज त्यांनी उमेदवारी अर्ज मागे न घेतल्यास चिंचवड पोटनिवडणुकीत तिरंगी सामना रंगेल. त्यामुळे मविआच्या मतांमध्ये फूट पडून त्याचा फायदा भाजपला मिळण्याची शक्यता आहे.
