पुरुषांपेक्षा महिलांमध्ये सर्वाधिक अँटिबॉडी; पालिकेचा सर्व्हे

मुंबई: महापालिकेच्या सीरो सर्व्हेतून एक आश्चर्यकारक माहिती पुढे आली आहे. पुरुषांपेक्षा महिलांमध्ये सर्वाधिक अँटिबॉडिज तयार झाल्याचं या सर्व्हेतून निष्पन्न झालं आहे. २ हजार २९७ म्हणजे ५९.३ टक्के महिलांमध्ये अँटिबॉडी असल्याचं आढळून आलं आहे. त्या तुलनेत फक्त १ हजार ९३७ म्हणजे ५३.२ टक्के पुरुषांमध्ये अँटिबॉडी तयार झाल्याचं या सर्व्हेतून स्पष्ट झालं आहे.

अनेक देशांमध्ये पुरुष आणि स्त्रियांमधील अँटिबॉडीचं प्रमाण सारखंच असल्याचं आढळून आलं आहे. मात्र, मुंबईत हे प्रमाण उलटं असल्याचं दिसून आलं आहे. विशेष म्हणजे मुंबईत पुरुषांच्या तुलनेत महिला रुग्णांची संख्या कमी आहे. मुंबईत ४५ टक्के महिला करोनाबाधित असून ५५ टक्के पुरुष करोनाबाधित असूनही महिलांमधील अँटिबॉडीचं प्रमाण सर्वाधिक आहे. मुंबईत तीन वॉर्डातील झोपडपट्ट्यांमध्ये पालिकेने हा केला आहे. त्यात २ हजार २९७ म्हणजे ५९.३ टक्के महिलांमध्ये अँटिबॉडी असल्याचं आढळून आलं आहे. त्या तुलनेत १ हजार ९३७ म्हणजे ५३.२ टक्के पुरुषांमध्ये अँटिबॉडी तयार झाल्याचं या सर्व्हेतून स्पष्ट झालं आहे. झोपडपट्ट्यांमधील महिलांमध्ये अँटिबॉडीचं सर्वाधिक प्रमाण असल्याचंही हा सर्व्हे सांगतो, असं या सर्व्हेशी संबंधित डॉ. उल्हास कोलथूर यांनी सांगितलं.

पुरुषांपेक्षा स्त्रियांमधील अँटिबॉडी निर्माण होण्याचं कारण सामाजिक आणि जैविकशास्त्रीय असू शकतं, असं पालिकेच्या मोल्युक्यूलर डायग्नोस्टिक लॅबोरेटरीच्या प्रमुख डॉ. जयंती शास्त्री यांनी सांगितलं. सर्व्हे केल्यानंतर दुसऱ्या दिवशी आम्ही त्याचे निष्कर्ष जाहीर करतो. आपण हर्ड इम्युनिटीच्या दिशेने जात आहोत. त्यामुळे आता वैयक्तिक स्वच्छता पाळणं, स्वच्छतेचं निरीक्षण करणं आणि येणाऱ्या काही महिन्यांसाठी सक्तीने मास्क वापरणं हे अत्यंत महत्त्वाचं आहे, असं पालिकेचे अतिरिक्त आयुक्त सुरेश काकानी यांनी सांगितलं.

या सर्व्हेतून करोनाची लक्षणं नसलेल्यांचंही निरीक्षण करण्यात आलं आहे. करोनाची लक्षणं नसलेल्यांकडून करोनाची लागण न झालेल्यांना करोना होण्याची शक्यता अत्यंत कमी आहे. मात्र, करोनाची लक्षणे असलेल्यांकडून लक्षणे नसलेल्यांना लागण होण्याचं प्रमाण अधिक असल्याचं आढळून आलं आहे. मात्र, पालिकेने करोनाची लक्षणे असलेल्यांना क्वॉरंटाइन करण्याचा निर्णय घेतल्यापासून करोनाचा संसर्ग पसरण्याचं प्रमाण कमी झालं, असंही काकानी म्हणाले. ६० वर्षांवरील व्यक्तीमध्ये करोनाची लागण होण्याचं प्रमाण अधिक आहे. त्यातुलनेत २५ ते ४० वयोगटातील लोकांमध्ये करोनाची बाधा होण्याचं प्रमाण कमी असल्याचं या सर्व्हेतून आढळून आलं आहे.