धनुष्यबाण-शिवसेना नाव शिंदे गटाकडे, ‘सामना’ मुखपत्रातून ठाकरे गटाचा कोणावर निशाणा?
राजू शेट्टी हे २०१९ च्या निवडणुकीपासून महाविकास आघाडीसोबत होते. मात्र सत्ताकाळात त्यांचे आघाडीच्या नेत्यांसोबत मतभेद झाले आणि ते आघाडीपासून दूर गेले. मात्र शिवसेनेतील फुटीनंतर आणि त्यावर निवडणूक आयोगाने घेतलेल्या निर्णयाच्या पार्श्वभूमीवर राजू शेट्टी यांनी माजी मुख्यमंत्री उद्धव ठाकरे यांची बाजू घेत भाजपविरोधात हल्लाबोल केला आहे.
राऊतांकडूनही संताप
शिवसेना पक्षचिन्ह आणि नाव एकनाथ शिंदे यांच्या गटाला देण्याचा निर्णय निवडणूक आयोगाने घेतल्यानतंर शिवसेना उद्धव बाळासाहेब ठाकरे या पक्षाचे नेते आणि खासदार संजय राऊत यांनी आक्रमकपणे आपल्या भावना व्यक्त केल्या आहेत. “सत्यमेव जयते हे ब्रीदवाक्य तोडून आता असत्यमेव जयते करावे लागेल. खरेदी, विक्री कुठपर्यंत गेली आहे, हे स्पष्ट झाले. जो पक्ष बाळासाहेब ठाकरे आणि लाखो शिवसैनिकांनी रक्त आणि बलिदान देऊन उभा केला, तो पक्ष आणि चिन्ह ४० बाजारबुणगे विकत घेतात, याची नोंद इतिहासात राहील. देशातील निवडणूक आयोगावरचा विश्वास जनतेने गमावला. या देशामधील सर्व स्वायत्त यंत्रणांना गुलाम करण्याचा प्रयत्न सुरू आहे. त्यातीलच हे एक महत्त्वाचे पाऊल आहे. न्यायालय, तपास यंत्रणा, निवडणूक आयोग कुणाचे तरी गुलाम असल्यासारखे वाटत आहे. या निर्णयाला आम्ही नक्कीच आव्हान देऊ. पण ४० बाजारबुणगे पैशांच्या जोरावर बाळासाहेबांची शिवसेना आणि धनुष्यबाण विकत घेऊ शकत असतील तर देशातील जनतेचा लोकशाहीवरचा विश्वास उडून जाईल. हे सर्व दबावाखाली झाले आहे. महाराष्ट्रावर सूड उगवण्याचा हा प्रयत्न आहे. भविष्यामध्ये महाराष्ट्राची राजधानी मुंबईवर शिवसेना किंवा मराठी माणसाचा अधिकार राहू नये, यासाठी फेकलेला हा फास आहे,” असं राऊत म्हणाले.
