अपहृत मुलीची ६ महिन्यांनी सुटका, सोशल मीडियावर अॅक्टिव्ह होताच दोन भाऊ जाळ्यात

म. टा. प्रतिनिधी, : मुंब्रा परिसरातून सहा महिन्यांपूर्वी अल्पवयीन मुलीचे झाले होते. या प्रकरणामध्ये दोघा भावांना मुंब्रा पोलिसांनी यवतमाळमधून अटक केली असून, त्यांच्या तावडीतून अपहृत मुलीची सुखरूप सुटका केली. विशेष म्हणजे मोबाइल लोकेशनद्वारे पकडले जाण्याची भीती असल्याने आरोपी सोशल मीडिया अकाउंटद्वारे संबंधितांच्या संपर्कात होते. त्यामुळे पोलिसांनी संशयिताच्या आयडीचे लोकेशन मिळवले. तो अकाउंट आयडी अक्टिव्हेट होताच पोलिसांनी आरोपींच्या मुसक्या आवळल्या.

अपह्रित मुलीचे वय १७ वर्षे असून, ४ फेब्रुवारी ती अचानक गायब झाली. दुसऱ्या दिवशी ठाण्यात अपहरणाचा गुन्हा दाखल झाल्यानंतर या गुन्ह्यात जळगावमधील सात जणांचा सहभाग असल्याची बाब पोलीस चौकशीत निष्पन्न झाली. यामध्ये एका महिलेचाही समावेश आहे. यापैकी तन्वीर अहमद अजीजुद्दीन शेख आणि इस्तियाक अली लियाकत अली यांना पोलिसांनी फेब्रुवारी तसेच मार्च महिन्यात अटक केले होते. परंतु अन्य आरोपी मोबाइल व सिमकार्ड सतत बदलत असत. मोबाइल बंद ठेवून लॉकडाउनचा फायदा घेत अज्ञात स्थळी लपून बसले. त्यामुळे आरोपींचा शोध घेणे कठीण झाले होते. परंतु मोबाईल लोकेशनद्वारे पकडले जाण्याची शक्यता असल्याने आरोपी सोशल मीडियाद्वारे संबंधितांशी संपर्क करत असल्याची माहिती पोलिसांना समजली.

वरिष्ठ पोलीस निरीक्षक मधुकर कड यांच्या मार्गदर्शनाखाली सहाय्यक पोलीस निरीक्षक शहाजी शेळके या गुन्ह्याचा तपास करत असून, त्यांनी ठाणे सायबर सेलची मदत घेतली. तसेच संबंधित अॅप कंपनीकडे सातत्याने पाठपुरावा करून संशयिताच्या आयडीद्वारे आरोपींच्या संभावित लोकेशनची माहिती काढली. या माहितीनंतर पोलिसांचे पथक यवतमाळला रवाना झाले. यवतमाळमधील फुलसांगवी गावात अकाउंट आयडी अॅक्टीव्हेट झाल्याने मुंब्रा पोलिसांनी स्थानिक पोलिसांची मदत घेऊन आरोपींचा शोध घेतला. मुख्य आरोपी आबीद मजीद शेख आणि जावेद मजीद शेख यांना अटक केली. तसेच अपहृत मुलीला ताब्यात घेतले. दोन्ही आरोपी सख्खे भाऊ असल्याची माहिती वरिष्ठ पोलीस निरीक्षक मधुकर कड यांनी दिली. अशाप्रकारे पोलिसांनी मुलीची आरोपींच्या तावडीतून सुखरूप सुटका केली असून, मुलीला तिच्या नातेवाईकांच्या स्वाधीन करण्यात आले आहे.

तीन मोबाइल जप्त

आरोपींनी अन्य ओळखीच्या व्यक्तीकडील मोबाइलमधून अॅप आयडीचा वापर केला असून, त्यांचाही मुंब्रा पोलिसांनी शोध घेतला. याबाबत चौकशी करून मोबाइल आणि आरोपीकडील तीन मोबाइल, तसेच सिमकार्डही जप्त करण्यात आले आहेत.