सत्ता स्थापनेबाबतच्या 'त्या' विधानावरून चंद्रकांत पाटलांचा यू-टर्न

पुणेः राज्याच्या हितासाठी आम्ही आजही शिवसेनेसोबत एकत्र यायला तयार आहोत, असं विधान अलीकडेच भाजप प्रदेशाध्यक्ष यांनी केलं होतं. चंद्रकांत पाटील यांच्या या वक्तव्यामुळं तर्कवितर्क लढवले जात होते. अखेर चंद्रकांत पाटील यांनी आज याबाबत खुलासा केला आहे. माझं विधान माध्यमांनी चुकीच्या पद्धतीनं दाखवलं असल्याचा आरोप त्यांनी केला आहे. शिवसेनाच काय इतर कुठल्याही पक्षाला आमचा कोणताही प्रस्ताव नाही, असं स्पष्टीकरण त्यांनी दिलं आहे. पुण्यात आयोजित एका पत्रकार परिषदेत ते बोलत होते.

जर महाराष्ट्रात उद्या आमचं सरकार आलं तर सर्व स्थानिक स्वराज्य संस्था, सर्व विधानसभा, लोकसभा आम्ही स्वबळावरच लढणार आहोत. कारण भाजपच्या वोट बँकेवर आणि पंतप्रधान मोदींच्या नावावर विजयी व्हायचं आणि नंतर तिसरचं करायचं हे चालवून घेणार नाही, त्यापेक्षा प्रत्येकानं आपापलं लढावं, असं मी म्हटलं होतं. मात्र, माझं वाक्य उलटं वाचलं गेलं, असं त्यांनी म्हटलं आहे.

महाराष्ट्रात भाजपचं सरकार येण्याबाबत हा विषय नव्हता तर निवडणुका स्वबळावर लढवण्याचा होता. त्यामुळं शिवसेनाच काय इतर दुसऱ्या कोणालाही सरकार स्थापनेबाबतचा कुठलाही प्रस्ताव नाही, असंही ते म्हणाले आहेत.

देवेंद्र फडणवीसांनी फेटाळलं वृत्त

युतीबाबतचा कोणताही प्रस्ताव शिवसेनेला आम्ही दिलेला नाही वा शिवसेनेकडून असा काही प्रस्ताव आमच्याकडे आलेला नाही, असं फडणवीस यांनी स्पष्ट केलं होतं. राज्यातील सत्तेबाबत सध्या तरी कोणतीही चर्चा पक्षपातळीवर नाही. येत्या काळात स्वबळावर लढायचं, असा निर्णय पक्षाने घेतलेला आहे, असेही फडणवीस यांनी नमूद केले होते.

काय म्हणाले होते चंद्रकांत पाटील

‘राज्याच्या हिताच्या दृष्टीने आम्ही शिवसेनेसोबत आजही एकत्र यायला तयार आहोत. केंद्रीय नेतृत्वानं एखादा फॉर्म्युला तयार केला आणि मुख्यमंत्री यांना तो मान्य झाला तर भाजप-शिवसेना एकत्र येऊ शकते. आम्हाला केंद्राचे आदेश पाळावेच लागतात,’ असं ते म्हणाले होते. पाटलांच्या या वक्तव्यामुळं अनेक तर्कवितर्क लढवले जात होते. भाजप बॅकफूटवर गेल्याची चर्चा सुरू झाली. त्यानंतर लगेचच पाटील यांनी याबाबत स्पष्टीकरण दिलं. ‘शिवसेनेला उपरती झाली तर ते आमच्याकडे येतील. आम्ही तसा कुठलाही प्रयत्न करणार नाही. आताही शिवसेनेला आमच्यासोबत सरकार स्थापन करायचं असेल तर आम्ही एकत्र येऊ. काँग्रेस व राष्ट्रवादीला बाजूला ठेवायचं असं उद्धव ठाकरे यांना वाटलं तर केंद्रीय नेतृत्वाला ते तसं सांगतील. या भविष्यातील शक्यता आहेत,’ असंही ते म्हणाले.