अरेरे! करोनाची बाधा झालेल्या पहिल्या श्वानाचा मृत्यू

न्यूयॉर्क: अमेरिकेत करोनाच्या संसर्गाने थैमान घातले आहे. माणसांप्रमाणे प्राण्यांनाही करोनाची बाधा होत आहे. अमेरिकेत कोविड-१९ ची बाधा झालेल्या एका ‘जर्मन शेपर्ड’ श्वानाचा मृत्यू झाला आहे. करोनाची बाधा झालेल्या श्वानाचा हा पहिला मृत्यू आहे. या श्वानाला एप्रिल महिन्यात श्वास घेण्यास त्रास होत होता. त्यानंतर काही आठवडे या श्वान करोनाबाधित होता.

स्टेम आयलँड येथील रॉबर्ट आणि एलिसन माहनी यांनी ‘नॅशनल जिओग्राफी’ वाहिनीला सांगितले की, एप्रिल महिन्यात श्वान ‘बडी’ हा आजारी पडला. त्यानंतर सातत्याने तो आजारीच होता. एका प्राण्यांच्या डॉक्टराने बडीची आरोग्य तपासणी केल्यानंतर त्याला करोनाची बाधा झाली असल्याचे समोर आले. अमेरिकेच्या कृषी विभागाने जून महिन्यात एका ‘जर्मन शेपर्ड’ श्वानाला करोनाची बाधा झाली असल्याची माहिती दिली. हा पहिलाच करोनाबाधित रुग्ण होता. बडीची प्रकृती आणखी ढासळल्यानंतर अखेर त्याचा ११ जुलै रोजी मृत्यू झाला. बडीच्या रक्त चाचणीत लिम्फोमा (रोग प्रतिकारक शक्तींचा कर्करोग) झाला असल्याचेही आढळले. त्यामुळे त्याचा मृत्यू करोनामुळेच झाला की अन्य काही वैद्यकीय कारणांमुळे झाला, याची माहिती समोर आली नाही.

वाचा: वाचा:

अमेरिकेच्या कृषी विभागाने दिलेल्या माहितीनुसार, अमेरिकेत अनेक प्राण्यांना करोनाची बाधा झाली आहे. आतापर्यंत १२ श्वान, १० मांजरी, एक वाघ आणि एका सिंहाला करोनाची बाधा झाली आहे. प्राण्यांपासून करोनाचा संसर्ग फैलावण्याचा पुरावा अद्याप सापडला नाही. मात्र, काही परिस्थितींमध्ये माणसांमधून प्राण्यांमध्ये करोनाचा संसर्ग होत असावा अशी शक्यता कृषी विभागाने व्यक्त केली आहे.

वाचा:

दरम्यान, जगभरातील २०० देशांमध्ये
संसर्गाचे थैमान सुरू आहे. करोनाचा सर्वाधिक संसर्ग अमेरिकेत झाला असून करोनाबाधितांची संख्या दिवसेंदिवस वाढत आहे. करोनाच्या आजारामुळे प्राण गमावलेल्या नागरिकांची संख्या एक लाख ५० हजारांहून अधिक झाली आहे. अमेरिकेत सर्वाधिक करोनाबाधितांच्या मृत्यूची नोंद करण्यात आली आहे. अमेरिकेत ४५ लाखांहून अधिकजणांना करोनाची बाधा झाली आहे. त्यापैकी एक लाख ५३ हजारजणांचा मृत्यू झाला आहे. तर, २२ लाखांहून अधिकजणांनी करोनावर मात केली आहे. अमेरिकेनंतर सर्वाधिक करोनाबाधित ब्राझीलमध्ये आढळले आहेत. ब्राझीलमध्ये २५ लाख नागरिकांना करोनाची बाधा झाली आहे. तर, ९० हजारांहून अधिकजणांचा मृत्यू झाला आहे. भारतात १६ लाखांहून अधिक करोनाबाधितांची नोंद करण्यात आली असून त्यापैकी ३५ हजारजणांचा मृत्यू झाला आहे.