पुणे: चंद्रकांत पाटील यांच्या नावानं उकळली खंडणी; भामटे जेरबंद

म. टा. प्रतिनिधी, पुणे: भारतीय जनता पक्षाचे प्रदेशाध्यक्ष आणि कोथरूडचे आमदार यांच्या नावाने खंडणी उकळणाऱ्या तिघांना कोथरूड पोलिसांनी अटक केली आहे. तिघा संशयितांच्या विरोधात व पिंपरी-चिंचवड येथील निगडी, कोथरूड, डेक्कन, अलंकार या चार पोलीस ठाण्यांत गुन्हे दाखल आहेत.

करोनासाठी मोठा खर्च झाला असून काही मदत मिळावी, यासाठी आमदार पाटील यांच्या नावाने विविध क्षेत्रांतील लोकांकडून देणगीच्या नावाखाली पैसे घेतले जात असल्याचे प्रकार समोर आले होते. या प्रकरणी आमदार चंद्रकांत पाटील यांनी कोथरूड पोलीस ठाण्यात तक्रार दिली होती. याचा तपास करत पोलिसांनी सौरभ अष्टुल (वय २७), किरण शिंदे (वय ३८), किरण कांबळे (वय ३०, तिघेही रा. लोहिया नगर, गंज पेठ) यांना अटक केली आहे. तर यातील चौथा संशयित आरोपी विशाल शेंडगे (वय ३०, रा. गंज पेठ) हा सध्या फरारी आहे.

आमदार पाटील यांच्या कार्यालयातून बोलत आहे, असे संशयित आरोपी सांगायचे. करोनाच्या कालावधीत भाजपच्या वतीने गोरगरिबांना मदत केली केली जात आहे. हे काम कायम सुरू ठेवण्यासाठी देणगीची गरज आहे, असे सांगून हे संशयित आरोपी शहरातील डॉक्टर, बांधकाम व्यावसायिक, गणेशोत्सव मंडळाचे पदाधिकारी यांच्यासह विविध क्षेत्रातील प्रतिष्ठित व्यक्तींना फोन करत होते. थेट पाटील यांच्याच नावाने फोन केले जात असल्याने नागरीक देखील मदत करत होते. मात्र एका प्रकरणात देणगीसाठी दमदाटी करण्यात आली. त्यामुळे संशय आला. संबंधित व्यक्तीने थेट पाटील यांच्याशी संपर्क साधला. त्यानंतर हा सर्व प्रकार उघडकीस आला, असे पोलीस उपनिरीक्षक संतोष पाटील यांनी सांगितले.

समाजातील नामांकित व्यक्तींची नावे घेऊन विशाल शेंडगे व सुरेश कांबळे हे दोघे २०१४ पासून नागरिकांना गंडा घालत होते. पैसे मिळू लागल्यानंतर या दोघांनी थेट आमदार -खासदारांच्या नावाचा वापर करण्यास सुरुवात केली. या संशयित आरोपींमध्ये किरण शिंदे हा रिक्षाचालक आहे, तर सौरभ अष्टलु व सुरेश कांबळे हे दोघे महापालिकेत कंत्राटी पद्धतीने काम करत होते. या चौघांनी एकत्र येऊन लोकांची फसवणूक करण्यास सुरुवात केली, अशी माहिती पोलिसांनी दिली.