बापरे! 'या' जिल्ह्यातील कारागृहात ६६ कैदी करोनाबाधित

म.टा.प्रतिनिधी, नगरः नगर जिल्ह्यातील चार तालुक्यांमध्ये बंदिवासात असणाऱ्या ६६ कैद्यांना आतापर्यंत करोनाची लागण झाली असल्याचे समोर आले आहे. यामध्ये न्यायलयीन कोठडी तसेच पोलीस कोठडीमध्ये असणाऱ्या कैद्यांचा समावेश आहे.

नगर जिल्ह्यामध्ये करोनाचा प्रादुर्भाव दिवसेंदिवस वाढत आहे. गेल्या काही दिवसांपासून तर तीन अंकी रुग्णसंख्या वाढत आहेत. आता नगर जिल्ह्यातील श्रीरामपूर, नेवासा, संगमनेर व राहुरी या चार तालुक्यांमध्ये बंदिवासात असणाऱ्या कैद्यांनाही करोनाची लागण झाल्याचे समोर आले आहे. त्यामुळे आता करोनाने कारागृहामध्ये शिरकाव केल्याचे चित्र आहे. श्रीरामपूर तालुका प्रशासनाकडून मिळालेल्या माहितीनुसार येथे बंदिवासात ४० कैदी असून त्यापैकी १९ जणांना करोनाची बाधा झाली आहे. यामध्ये १८ न्यायालयीन कोठडीत तर १ पोलीस कोठडीमध्ये आहे. तर, नेवासा तालुक्यात बंदिवासात असणाऱ्या ४७ कैद्यांपैकी एकूण २३ जणांना करोनाची बाधा झाली आहे.

नेवासा तालुका प्रशासनाकडून ही माहिती देण्यात आली. याशिवाय संगमनेर तालुका प्रशासनाने दिलेल्या माहितीनुसार येथे ४६ पैकी २२ कैद्यांना करोनाची लागण झाली आहे. या २२ पैकी दोन कैद्यांची नुकतीच जामीनावर सुटका झाली आहे. याशिवाय राहुरी तालुक्यात पोलीस कोठडीत असलेल्या दोन कैद्यांना करोनाची बाधा झाल्याची माहिती देण्यात आली.

दरम्यान, नगर जिल्ह्यामध्ये करोनाचा प्रादुर्भाव हा दिवसेंदिवस वाढत आहे. आज नगरमध्ये आणखी ४० बाधित रुग्ण वाढले आहे. त्यामुळे आता एकूण बाधितांचा आकडा हा ४ हजार ६५३ एवढा झाला आहे. तर, आज एकूण ४११ जणांनी करोनावर मात केली आहे. त्यामुळे आतापर्यंत करोनामुक्त झालेल्या रुग्णांची संख्या ३ हजार ३६० एवढी झाली आहे. सध्या हॉस्पिटलमध्ये उपचार घेत असलेल्या रुग्णांची संख्या १ हजार २३३ एवढी असून करोनामुळे आतापर्यंत ६० जणांचा मृत्यू झाला आहे. करोनाचा प्रादुर्भाव हा दिवसेंदिवस वाढत असल्यामुळे प्रशासन अधिकच सतर्क झाले आहे. हा प्रादुर्भाव रोखण्यासाठी विविध प्रतिबंधात्मक उपाययोजना करण्यावर भर दिला जात आहे. प्रशासनातील वरिष्ठ अधिकारी सातत्याने परिस्थितीचा आढावा घेत आहेत