मुंबई : काचा नसलेल्या बसेस, त्यावर करण्यात आलेली सरकारी जाहिरात आणि त्या बसेसमधून प्रवाशांचा जीवघेणा प्रवास, असा फोटो दोन दिवसांपूर्वी सोशल मीडियावर व्हायरल झाला होता. तो फोटो धाराशिव जिल्ह्यातील भूम तालुक्यातील फैजान या व्यक्तीने काढला होता. या फोटोची दखल आज विरोधी पक्षनेते अजित पवार यांनी घेतली. अर्थसंकल्पीय अधिवेशनाच्या दुसऱ्या दिवशी अजितदादांनी सभागृहात सत्ताधाऱ्यांची अनेक प्रश्नांवरुन शाळा घेतली. फुटलेल्या काचा बघून तर मुख्यमंत्री हसत नाहीत ना… असा चिमटा काढत जाहिरात कशावर करावी हे तरी कळत का? अशा शब्दात अजित पवार यांनी सत्ताधाऱ्यांना सुनावलं.
राज्य विधिमंडळाच्या अर्थसंकल्पीय अधिवेशनाचा दुसरा दिवस आज विरोधकांनी गाजवला. अजित पवार यांनी तर विविध मुद्द्यांवरुन सत्ताधाऱ्यांवर अक्षरश: प्रश्नांच्या फैरी झाडल्या. शेतकरी प्रश्न, कांदा-कापूस दर, छत्रपती शिवराय-बाबासाहेब आंबेडकरांच्या स्मारकांचा प्रश्न, राज्यातल्या कायदा सुव्यवस्थेची परिस्थिती, एसटीची दुरावस्था, कर्मचाऱ्यांचे थकलेले पगार अशा मुद्द्यांवर अजित पवार यांनी तासभर तडाखेबंद भाषण केलं.
फुटलेल्या काचा दाखवून अजित पवारांनी सत्ताधाऱ्यांचा पानउतारा केला
अजित पवार यांनी एसटीच्या निखळलेल्या काचांचा फोटो सभागृहात दाखवून सत्ताधाऱ्यांवर हल्ला चढवला. सत्तेत बसलेली माणसं जाहिरातबाजीच्या नावाखाली कोट्यवधी रुपयांचा कसा चुराडा करतायेत, हे मी दोन दिवसांपूर्वीच सांगितलं होतं. आता हा फोटो बघा… एसटीच्या सगळ्या काचा निखळल्या आहेत. कशाला असले धंदे करता रे?? असल्या दळभद्री बसवर जाहिरातबाजी करता? किमान नवी कोरी बस घेऊन त्यावर तरी जाहिरात करा, एवढी तरी डोकी चालवा… अशा शब्दात अजित पवार यांनी सरकारमधील नेत्यांना सुनावलं.
एसटीची दुरावस्था ते सरकारची जाहिरात, सोशल मीडियावर व्हायरल झालेला फोटो नेमकं काय सांगतो?
पेट्रोल भरायला आम्ही पेट्रोल पंपावर जायचो. तेव्हा मोदीसाहेब मोठ्या फ्लेक्समधून आमच्याकडे बघून हसायचे. कशीये पेट्रोलची भाववाढ… आता तसंच एसटीची दुरावस्था बघून मुख्यमंत्री मोठ्याने हसतायेत असा या जाहिरातबाजीतून अर्थ निघतो, असं अजित पवार म्हणाले. त्यावर विरोधी पक्षाचे आमदार खळखळून हसले. तर अजितदादांनी केलेला पानउतारा ऐकून सत्ताधाऱ्यांचा मात्र चेहरा पडला.
होय मी होणार लखपती… अशी सरकारची आणखी एक जाहिरात अजित पवार यांनी सभागृहात दाखवली. यात पंतप्रधान मोदी आणि मुख्यमंत्री शिंदे यांचे फोटो छोटे असल्याचं सांगून उपमुख्यमंत्री फडणवीस यांचा फोटो ५ पटींनी मोठा आहे असं अजित पवार यांनी सांगितल्यावर सगळे आमदार खो खो हसायला लागले. यावर अजितदादांनाही आपलं हसू आवरता आलं नाही. आशिष शेलार साहेब तुम्हाला मंत्री करत नाहीत किमान अशी जाहिरातबाजी तरी तुम्ही नजरेखालून घालण्याचं काम करा की… असा चिमटा अजितदादांनी काढला.
