भाजपसह मित्र पक्षांचा उद्या एल्गार; गरिबांना दूध वाटून आंदोलन करणार

म. टा. प्रतिनिधी, कोल्हापूर: दुधाला प्रतिलिटर दहा रूपये आणि दूध पावडर निर्यातीला किलोला पन्नास रूपये अनुदान मिळावे या मागण्यासाठी आणि त्यांच्या मित्रपक्षासह किसान संघर्ष समितीच्या वतीने शनिवारी राज्यव्यापी दूध संकलन बंद एल्गार पुकारण्यात आला आहे. दरम्यान, या आंदोलनात दूध रस्त्यावर न ओतता ते गरीबांना वाटण्यात येणार असल्याचे आंदोलकांच्या वतीने सांगण्यात आले.

वाचाः

दूध उत्पादकांना सध्या लिटरला केवळ १८ ते २० रूपये दर मिळत आहे. हा दर न परवडणारा आहे. यातून उत्पादन खर्च देखील भागत नसल्याने शेतकरी वर्गात नाराजीचे वातावरण आहे. या पार्श्वभूमीवर स्वाभिमानी शेतकरी संघटनेने आठ दिवसापूर्वी दूध संकलन बंद आंदोलन केले. त्याच वेळी भाजप व मित्रपक्षानी देखील आंदोलनाची हाक दिली होती. त्यानुसार शनिवार दि. एक ऑगस्ट रोजी दूध संकलन बंद आंदोलन करण्यात येणार आहे. यामध्ये किसान संघर्ष समिती, राज्यातील दूध उत्पादक संघटना देखील सहभागी होणार आहेत.

शनिवारी सकाळी हे आंदोलक गावागावातील सर्व दूध संकलन केंद्रावर निदर्शने करणार आहेत. शेतकऱ्यांनी संस्थेला दूध देऊ नये असे आवाहन यावेळी करण्यात येणार आहे. तरीही काही ठिकाणी असा प्रयत्न झाल्यास ते रस्त्यावर ओतण्याऐवजी गरीबांना वाटण्यात येणार आहे. राज्य सरकारने या आंदोलनाची दखल न घेतल्यास बेमुदत दूध संकलन बंद करण्याचा इशाराही देण्यात आला आहे.

दरम्यान, भाजपने हे आंदोलन प्रतिष्ठेचे केले असून अधिक आक्रमकपणे करण्याचे नियोजन करण्यात आले असून प्रमुख लोकप्रतिनिधी, नेतेही यात सहभागी होणार आहेत. रस्त्यावर दूध ओतण्यावर टीका होत असल्याने दोघांनीही आंदोलनात बदल केल्याचे दिसून येते. तरीही आंदोलनामुळे उद्या दूध पुरवठा मात्र विस्कळीत होणार आहे. शेतकरी संघटनांतर्फे गावोगावी चावडीवर आंदोलन होणार आहे. रस्त्यावर दूध ओतण्याच्या आंदोलनावर सर्वस्तरातून जोरदार टीका केली जाते. त्यामुळे यामध्ये बदल करून चावडीवर प्रतिकात्मक दुग्धाभिषेक करून गरजूंना दूध वाटप करण्याचे आंदोलन शेतकरी संघटना करणार आहेत. तर भाजपतर्फे निदर्शने आणि सरकारी अधिकाऱ्यांना निवेदन देण्यात येणार आहे.