पुणे : चिंचवड विधानसभा मतदारसंघाच्या पोटनिवडणुकीत भाजप उमेदवार अश्विनी जगताप यांनी राष्ट्रवादीच्या नाना काटे यांचा पराभव करत दणदणीत विजय मिळवला. चिंचवडचे आमदार लक्ष्मण जगताप यांच्या निधनानंतर झालेल्या या पोटनिवडणुकीत मतदारांनी जगताप कुटुंबावरच पुन्हा एकदा विश्वास दाखवत लक्ष्मण जगताप यांच्या पत्नी अश्विनी जगताप यांच्या पाठीशी उभं राहण्याचा निर्णय घेतला. या विजयानंतर लोकांनी विश्वास दाखवल्याबाबत अश्विनी जगताप यांनी समाधान व्यक्त केलं. मात्र माझ्या विजयावरही पती लक्ष्मण जगताप यांच्या जाण्याच्या दु:खाचं सावट आहे, असं अश्विनी जगताप यांनी म्हटलं. तसंच यावेळी लक्ष्मण जगताप यांच्या बहीण अलका झेंडे यांनीही भावाच्या आठवणी जागवल्या.
‘लक्ष्मणभाऊ लहान होते तेव्हा रक्षाबंधनाच्या दिवशी त्यांना राखी बांधल्यावर मला म्हणायचे की, चल आपण स्टुडिओत जाऊ आणि फोटो काढून येऊ. त्या काळात बाहेर फोटो काढायला जाणं म्हणजे घरचे काय म्हणतील, असा प्रश्न असायचा. मात्र तेव्हा स्टुडिओत काढलेला फोटो आजही माझ्याकडे आहे. भाऊला पुरण आवडायचे, मोठी बहीण असल्याने भाऊला मी पुरण गुपचूप काढून खायला द्यायचे,’ अशा आठवणी सांगताना लक्ष्मण जगताप यांची मोठी बहीण अलका झेंडे गहिवरल्या. पुलावरून जाताना सहज लागला धक्का, तरुणाला आला भयंकर राग; क्षणात केलं होत्याचं नव्हतं…
लक्ष्मण जगताप यांच्या निधनानंतर अश्विनी जगताप यांनी पोटनिवडणूक लढवली आणि त्या मोठ्या मताधिक्याने निवडूनही आल्या. लक्ष्मण जगताप यांना ज्या ठिकाणी अग्नी दिला तिथं जाऊन पत्नी अश्विनी जगताप यांनी आपल्या पतीला आजचा विजय समर्पित केला. यावेळी कुटुंबातील अनेक जणांच्या अश्रूंचा बांध फुटला. त्यात त्यांची मोठी बहीण अलका झेंडे या देखील होत्या.
अलका झेंडे यांनी लक्ष्मण जगताप यांच्या राजकीय प्रवासाविषयी बोलताना म्हटलं की, पहिल्यांदा राजकारणात जायचं होतं तेव्हा भाऊ मला देहूला विचारायला आला होता. मी निवडणुकीला उभा राहतो आहे. त्यावेळी देखील मी पाठिंबा दिला होता. मोठी बहीण ही आई समान असते. त्यामुळे भाऊंना घडताना डोळ्यासमोर पाहिले असल्याचे त्या म्हणाल्या.
दरम्यान, राजकारण आणि समाजकारण करताना आम्ही जसं भाऊंच्या पाठीशी उभे होतो, तसंच सर्व जगताप कुटुंब वहिनींच्या पाठीशी उभे राहू, असंही अलका झेंडे यांनी म्हटलं आहे.
पुलावरून जाताना सहज लागला धक्का, तरुणाला आला भयंकर राग; क्षणात केलं होत्याचं नव्हतं…
