१ हजार करोना मृतांची माहिती दडवली; प्रशासनाने मागविला अहवाल

म. टा. प्रतिनिधी, पुणे: शहरातील सुमारे एक हजार मृत्यूंची ’करोना बळी’ म्हणून नोंद झाली नसल्याचा गौप्यस्फोट पुण्याचे महापौर यांनी केल्याच्या पार्श्वभूमीवर जिल्हा प्रशासनाने ससून रुग्णालय प्रशासनाकडे जुलै महिन्यात ससूनमध्ये झालेले मृत्यू आणि मृत्यू झालेल्या रुग्णांबाबत भारतीय वैद्यकीय संशोधन संस्थेच्या (आयसीएमआर) मार्गदर्शक तत्त्वांचे पालन केले की नाही, याबाबतचा अहवाल मागविला आहे. हा अहवाल आल्यानंतर सत्य उघडकीस येणार आहे.

मुख्यमंत्री उद्भव ठाकरे यांनी गुरुवारी पुण्यात लोकप्रतिनिधींबरोबर बैठक घेतली. त्या बैठकीत महापौर मोहोळ यांनी हा गौप्यस्फोट केला. शहरातील एक हजार मृत्यूंची ‘करोना बळी’ म्हणून नोंद झालेली नाही. रुग्णालयात दाखल होण्यापूर्वी किंवा दाखल झाल्यानंतर लगेच मृत्यू झालेल्या रुग्णांचा करोनामुळे मृत्यू झाल्याची नोंद करण्यात आलेली नाही. या रुग्णांची करोना चाचणी करण्यापूर्वीच त्यांचा मृत्यू झाला आहे. मात्र, संबंधित रुग्णांच्या क्ष-किरण अहवालात फुफ्फुसांमध्ये दिसणाऱ्या डागांवरून त्यांना करोना संसर्ग असल्याचे दिसून आले आहे.

वाचाः

गेल्या दोन महिन्यांत ससूनमध्ये दररोज १२ रुग्णांचा मृत्यू झाला आहे, असा दावा महापौर मोहोळ यांनी केला आहे. या पार्श्वभूमीवर जिल्हा प्रशासनाने शुक्रवारी ससून प्रशासनाबरोबर बैठक घेतली. त्यामध्ये ससून प्रशासनाकडून याबाबतचा अहवाल मागविला आहे.

वाचाः

याबाबत विभागीय आयुक्त डॉ. दीपक म्हैसेकर आणि विशेष कार्य अधिकारी सौरभ राव म्हणाले, ‘ससून रुग्णालयात गेल्या वर्षी आणि यंदा जुलै महिन्यात मृत्यू झालेल्या रुग्णांची आकडेवारी मागविण्यात आली आहे. जुलै महिन्यात झालेल्या रुग्णांच्या मृत्यूनंतर ‘आयसीएमआर‘च्या नियमांचे पालन केले की नाही, याबाबत अहवाल देण्याचे आदेश दिले आहेत’

दरम्यान, मुख्यमंत्री उद्धव ठाकरे यांनी जंबो कोव्हिड सेंटर तातडीने उभी करण्याचे आदेश दिल्यानंतर प्रशासनाने जागा आणि कालावधी निश्चित केला असून, पुण्यात शासकीय शासकीय अभियांत्रिकी महाविद्यालय (सीओईपी) आणि श्री शिवाजी प्रिपरेटरी मिलिटरी स्कूल (एसएसपीएमएस) येथे २० ऑगस्टपर्यंत, तर पिंपरी चिंचवडमध्ये ऑटो क्लस्टर आणि बालनगरी येथे दहा ऑगस्टपर्यंत सेंटर कार्यान्वित होणार आहेत. त्यामुळे खाटांच्या उपलब्धतेचा प्रश्न मार्गी लागणार आहे.