पॅरासेलिंगसाठी गेलेल्या मुंबईच्या युवकाचा मृत्यू

मुंबई:
साकीनाका येथे राहणाऱ्या एका ३२ वर्षांच्या युवकाचा सिंधुदुर्ग जिल्ह्यातील किनाऱ्यावर अपघाती मृत्यू झाला आहे. रविवारी दुपारी पॅरासेलिंग करताना हा अपघात घडला.

अझर अन्सारी असं या युवकाचं नाव आहे. तो आणि त्याची पत्नी हीना (२४) यांचा अलीकडेच विवाह झाला होता. ते दोघेही १६ जणांच्या एका गटासोबत पॅरासेलिंग करण्यासाठी गेले होते, अशी माहिती मालवण पोलीस ठाण्याचे पोलीस निरीक्षक विनीत चौधरी यांनी दिली.

‘अझर अन्सारी पॅरासेलिंग करण्याआधी डेकच्या मागच्या भागात बसला होता. तेथून तोल जाऊन समुद्रात पडला. दुर्दैवाने, त्याने लाइफजॅकेट घातले नव्हते. त्यामुळे त्याचा बुडून मृत्यू झाला,’ अशी माहिती चौधरी यांनी दिली. बचाव पथकाने त्याला पाण्याबाहेर काढलं आणि तत्काळ नजीकच्या रुग्णालयात नेलं. मात्र तिथे जाण्यापूर्वीच त्याचा मृत्यू झला होता. या घटनेची अपघाती मृत्यू म्हणून पोलिसांनी नोंद केली आहे आणि चौकशी सुरू आहे.