म. टा. प्रतिनिधी, ठाणेः औषधांच्या आडून करण्यात येणाऱ्या गुटखा तस्करीचा कळवा पोलिसांनी पर्दाफाश केला आहे. शुक्रवारी रात्री कळव्यातील पारसिक सर्कल येथे पोलिसांनी टेम्पो पकडल्यानंतर टेम्पोमध्ये असलेला गुटख्याविषयी कळू नये यासाठी तस्करांनी गुटख्याच्या गोण्यांच्या पुढे आणि मागे चक्क औषधे ठेवली होती. गुटखा तस्करांची ही चलाखी पोलिसांच्या तीक्ष्ण नजरेने बरोबर ओळखली. आणि टेम्पोमधून तब्बल २२ लाखांचा गुटख्याच्या साठ्यासह १० लाखांची औषधे जप्त करत पोलिसांनी टेम्पो चालकाला अटक केली आहे. या प्रकरणात एकूण सहा जणांविरुद्ध गुन्हा दाखल झाला आहे. आरोपीमध्ये एका ट्रान्सपोर्ट कंपनीच्या मालकाचाही समावेश आहे.
मुंब्र्याकडून पारसिक सर्कलकडे टेम्पोमधून गुटख्याची वाहतूक करण्यात येणार असल्याची माहिती कळवा पोलिस ठाण्यातील सहायक पोलिस निरीक्षक निलेश कानडे यांना मिळाली होती. कानडे तसेच अन्य पोलिसांनी शुक्रवारी रात्री पारसिक सर्कल परिसरात सापळा लावत एक टेम्पो पकडला. टेम्पो चालकाला पोलिसांनी ताब्यात घेत टेम्पोची तपासणी केल्यानंतर टेम्पोमध्ये खाकी रंगाचे चौकोनी बॉक्स आढळून आले. हे बॉक्स पोलिसांनी बाजूला केल्यानंतर आतमध्ये पांढऱ्या रंगाच्या प्लास्टिकच्या मोठ्या गोण्या होत्या. त्यापलीकडे आणखीन खाकी रंगाचे चौकोनी बॉक्स होते. मग पोलिसांनी पांढऱ्या रंगाच्या गोण्यामध्ये नेमके काय आहे, हे बघितल्यानंतर या गोण्यामध्ये मोठ्या प्रमाणावर गुटखा आढळून आला. याबाबत पोलिसांनी चालकाकडे विचारपूस केल्यानंतर तो नालासोपारा येथे राहत असल्याची बाब चौकशीमध्ये समोर आली. तसेच गुटख्याचा साठा हैदराबाद येथून भिवंडीला नेण्यात येत होता, असेही त्याने सांगितले. चालकाने आणखीन चार जणांची नावे पोलिसांना सांगितली असून भिवंडीला टेम्पो पोहचल्यानंतर हे चारजण टेम्पोतील माल घेणार असल्याचा खुलासा त्याने पोलिसांपुढे केला आहे. सह्या कर नाहीतर मुलीसोबत वाईट कृत्य करेन, तरुणाला धमकी देत सावकारांनी बळकावले घर कळवा पोलिसांनी या कारवाईमध्ये गुटख्याचा २२ लाखांचा साठा, १० लाखांपेक्षा अधिक किंमतीची औषधे (२६५ बॉक्स), टेम्पोसह एकूण ४७ लाख ७४ हजारांचा मुद्देमाल जप्त केला आहे. विशेष म्हणजे गुटख्याची ही तस्करी औषधांच्या आडून करण्यात येत असल्याची बाब समोर आली आहे. टेम्पोमधून गुटख्याची वाहतूक करत असताना, याबाबत कोणाला काही कळू नये यासाठी तस्करांनी गुटख्याच्या गोण्यांच्या पाठीमागे आणि पुढे औषधे ठेवली होती. तस्करांची ही चलाखी पोलिसांनी ओळखली. या प्रकरणी टेम्पो चालक, मुंबईतील एका ट्रान्सपोर्ट कंपनीच्या मालकासह एकूण सहा जणांविरुद्ध कळवा पोलिस ठाण्यात गुन्हा दाखल झाला आहे. टेम्पो चालकाला पोलिसांनी अटक केली असून अन्य आरोपींचा पोलिस शोध घेत आहेत.
सह्या कर नाहीतर मुलीसोबत वाईट कृत्य करेन, तरुणाला धमकी देत सावकारांनी बळकावले घर
