सतेज पाटील यांनी सोमवारी एक ट्विट करुन विजय शिवतारे यांना धारेवर धरले. पुरोगामी राज्याचे हे बुरसटलेले सत्ताधीश! जनाधार जात असल्याची धास्ती घेतल्याने असे काहीतरी बोलून महाराष्ट्राची प्रतिमा मलीन केली जात आहे, वेळीच आवरा, असा इशारा सतेज पाटील यांनी शिवतारे यांना दिला. त्यामुळे या मुद्द्यावरुन आता राजकीय वातावरण तापण्याची शक्यता आहे. भाजप आणि शिंदे गटाचे नेते आता या लढाईत उडी घेणार का, हे पाहावे लागेल.
या विषयाबद्दल माझा फारसा अभ्यास नाही, मांसाहारी भोजनानंतर देवदर्शनाबद्दल सुप्रिया सुळेंचं स्पष्टीकरण
नेमका वाद काय?
विजय शिवतारे यांनी त्यांच्या फेसबुकवरून एक पोस्ट शेअर केली. यामध्ये त्यांनी सुप्रिया सुळे यांच्या पुणे दौऱ्याचे फोटो टाकले होते. सुप्रिया सुळेंनी आधी मटण खाल्लं. मग भैरवनाथ मंदिरात जाऊन दर्शन घेतलं. मग महादेव मंदिरात गेल्या. मग दिवेघाट ओलांडून सासवडला गेल्या. सासवडला त्यांनी संत सोपानकाकांचे दर्शन घेतले. येणेवरे ज्ञान देवो सुखिया जाहला , अशी खोचक टिप्पणी विजय शिवतारे यांनी केली होती. शिवतारे यांच्या या फेसबुक पोस्टनंतर सोशल मीडियावर या विषयाची चर्चा सुरु झाली. सुप्रिया सुळे यांना याविषयी विचारण्यात आले तेव्हा त्यांनी, ‘माझा या विषयावर फारसा अभ्यास नाही. विजय शिवतारे काय बोलले हे मला ठाऊक नाही’, असे सांगत या वादावर पडदा टाकण्याचा प्रयत्न केला होता.
सुप्रिया सुळेंनी पवारसाहेबांनी घालून दिलेल्या आदर्शाचे पालन करायला हवे होते: आनंद दवे
शिवतारेंच्या फेसबुक पोस्टवरून सुरु झालेल्या वादात हिंदू महासंघाचे अध्यक्ष आनंद दवे यांनीही उडी घेतली होती. त्यांनी सुप्रिया सुळे यांचा खोचक टोला लगावला होता. शरद पवार हे नॉनव्हेज खाल्ल्यानंतर दगडूशेठ गणपतीच्या मंदिरात गेले नव्हते. सुप्रिया सुळे यांनीही त्यांच्या या आदर्शाचे पालन करायला हवे होते. पण सुप्रिया सुळे मटण खाल्ल्यानंतर देवळात गेल्या. याचा अर्थ हिंदुत्त्वाच्या मुद्द्यावरुन पवार घराण्यात दोन वेगवेगळ्या विचारधारा आहेत, ही बाब आता सिद्ध झाली आहे, असे आनंद दवे यांनी म्हटले होते.
