हाय रिस्क, हाय प्रॉफिट… अदानी शेअर्सवर पुन्हा तेजीचा रंग, गुंतवणूकदारांनी काय करावं?आज ११ टक्क्यांहून अधिक उसळी
आज सोमवारी अदानी एंटरप्रायझेसच्या शेअरमध्ये ११ टक्क्यांहून अधिक वाढ झाली असून आज सकाळपासून स्टॉक मध्ये तेजीने कामकाज पाहायला मिळत आहे. अदानी समूहातील प्रमुख कंपनीचा स्टॉक सोमवार सकाळी १,९६६.७० रुपयांवर खुला झाला. त्यानंतर तो २,१३५ रुपयांच्या उच्चांकावर पोहोचला तर, सकाळी ११.३० वाजता शेअर २,०९१ रुपयांवर व्यवहार करत होता. अशा प्रकारे शेअरमध्ये जबरदस्त तेजी दिसत असून गुंतवणूकदारांनी बंपर नफा कमावला आहे. दरम्यान, अदानी ग्रुपची प्रमुख कंपनी, अदानी एंटरप्रायझेसच्या शेअर्समध्ये बंपर तेजी पाहायला मिळत असून शेअर खरेदीसाठी गुंतवणूकदारांची धडपड होताना दिसतेय.
दुसरीकडे, आठवड्याच्या पहिल्या व्यवहाराच्या दिवशी म्हणजे सोमवारी अदानी पॉवर, अदानी ग्रीन, अदानी ट्रान्समिशन, अदानी टोटल गॅस, अदानी विल्मार आणि एनडीटीव्हीचे समभाग ५-५ टक्के अप्पर सर्किट लागले आहे.
गौतम अदानींच्या रंगाचा बेरंग! शेअर्सची वाढ होताना आणखी एक धक्का, पाहा काय घडलं?
अदानींची कोटींची कमाई
गेल्या आठवड्यातील शेवटच्या व्यवहाराच्या दिवशी, शुक्रवारी गौतम अदानी यांच्या संपत्तीत झपाट्याने वाढ झाली. शुक्रवारी अदानींच्या शेअर्समध्ये सर्वाधिक वाढ झाली आणि समभागांच्या वाढीमुळे शुक्रवारी सलग दुसऱ्या दिवशी गौतम अदानी जगातील सर्वात मोठा नफा कमाई करणारे बनले. एका दिवसात त्याची संपत्ती १४ टक्क्यांनी वाढली. शुक्रवारी त्यांनी दर सेकंदाला सुमारे २ कोटी रुपये खिशात घातले.
मागील आठवडा गौतम अदानींसाठी फायदेशीर ठरला, त्यामुळे यंदाच्या आठवड्यातही त्यांच्या शेअर्सच्या वाटचालीवर सर्वांची नजर असेल. परदेशातील रोड शोमध्ये समूहाला चांगला प्रतिसाद मिळत आहे आणि सर्वोच्च न्यायालयाच्या चौकशी समितीबाबत अदानी समूहाकडून सकारात्मक संकेत मिळत असल्यामुळे गुंतवणूकदरांचा विश्वास पुन्हा एकदा परताना दिसत आहेत. गेल्या आठवड्यात सलग चार दिवस अदानीच्या शेअर्समध्ये तुफान तेजी राहिली असून या आठवड्यातही तेच अपेक्षित आहे.
