आयपीएलची महत्वाची बैठक उद्या, 'या' गोष्टींवर होणार चर्चा

आयपीएलबाबतची सर्वात महत्वाची बैठक उद्या होणार असल्याचे म्हटले जात आहे. या बैठकीमध्ये महत्वाच्या मुद्द्यांवर चर्चा होणार आहे. आयपीएलला अजूनही एक महत्वाची परवानगी मिळालेली नाही. या परवानगीबाबत या बैठकीमध्ये चर्चा होऊ शकते.

यावर्षी आयपीएल युएईमध्ये १९ सप्टेंबरपासून सुरु होणार आहे. युएईच्या क्रिकेट मंडळाने या गोष्टीला परवानगी दिली आहे. पण बीसीसीआयला अजूनही भारत सरकारची परवानगी मिळालेली नाही. त्यामुळे आयपीएल युएईमध्ये खेळवण्यासाठी भारत सरकारची कशी परवानगी घेता येईल, यावर या बैठकीमध्ये विचार केला जाणार आहे. त्याचबरोबर युएईमध्ये आयपीएल भरवताना खेळाडूंच्या संख्येवरही मर्यादा आणण्याचे बीसीसीआयने ठरवले आहे. त्याचबरोबर खेळाडू आणि सपोर्ट स्टाफ यांना आपल्या बायकांनाही युएईमध्ये न्यायचे आहे. या काही मुद्द्यांवर आयपीएलच्या प्रशासकीय समितीच्या बैठकीमध्ये निर्णय घेतला जाऊ शकतो.

युएईमध्ये आयपीएल खेळवत असताना बऱ्याच गोष्टींचा सामना बीसीसीआयला करावा लागू शकतो. खेळाडूंचा प्रवास, त्याचबरोबर त्यांचे राहणे आणि युएईमधील प्रवास, या साऱ्या गोष्टींचा विचार बीसीसीआयला करावा लागणार आहे. त्याचबरोबर युएईमध्ये कोणते नियम लागू आहेत, हेदेखील बीसीसीआयला पाहावे लागणार आहे. त्यामुळे आयपीएलबाबतच्या सर्व विषयांवर या बैठीकत चर्चा होईल, असे म्हटले जात आहे.

आयपीएलमध्ये आठ संघ आहेत. आयपीएलच्या प्रत्येक संघात ३०-३५ खेळाडू असल्याचे पाहायला मिळते. त्याचबरोबर १०-१५ जणांचा सपोर्ट स्टाफ असतो. त्यामुळे ही संख्या ५० पर्यंत जाते. यावेळी आपल्या बायकांनादेखील युएईतील आयपीएलसाठी न्यावे, अशी विनंतीही बीसीसीआयला करण्यात आली आहे. जर प्रत्येक संघातून जवळपास १०० व्यक्ती युएईला जाणार असतील, तर सर्व काही कठीण होऊन बसेल. त्यामुळे बीसीसीआयने सर्वच संघांच्या मालकांना खेळाडूंची संख्या कमी करण्यासाठी विनंती केली आहे.

ही स्पर्धा भारतात असली असती तर खेळाडूंच्या संख्येवर मर्यादा आली नसती. पण ही स्पर्धा युएईमध्ये होणार असून त्यासाठी जास्त खर्च होणार असल्याचे म्हटले जात आहे. त्यासाठी खर्च आणि जोखीम कमी करण्यासाठी बीसीसीआयने प्रत्येक संघ मालकांना आपल्या संघात २० खेळाडूच ठेवावेत, अशी विनंती केली असल्याचे समजत आहे. त्यामुळे आता याचा आयपीएलमधील सामन्यावर किती परीणाम होईल, हे स्पर्धा सुरु झाल्यावर पाहायला मिळेल.