Sadanand Kadam ED Arrest, अनिल परब यांचे निकटवर्तीय सदानंद कदम यांना ईडीकडून अटक, ४ तासांच्या चौकशीनंतर कारवाई – sadanand kadam arrested by ed over dapoli resort case

मुंबई : मुरुड येथील साई रिसॉर्ट प्रकरणी उद्योजक सदानंद कदम यांना ईडीने अटक केली आहे. चार तासांच्या चौकशीनंतर सदानंद कदम यांना अटक करण्यात आलेली आहे. सदानंद कदम हे रामदास कदम यांचे धाकटे बंधू आहेत तसेच ठाकरे गटाचे नेते अनिल परब यांचे ते व्यावसायिक भागीदार आहेत. उद्धव ठाकरे यांच्या खेडमधील सभेसाठी संजय कदम यांनी मोठी ताकद लावल्याचं बोललं गेलं. सभा पार पडून आठवडा उलटत नाही तोच संजय कदम यांना ईडीने बेड्या ठोकल्याने उलट सुलट चर्चांना सुरुवात झाली आहे.

व्यावसायिक सदानंद कदम यांना सक्तवसुली संचालनालय अर्थात ईडीच्या पथकाने आज (शुक्रवार) पहाटे ताब्यात घेतले. सुरुवातीला एक तास त्यांच्याशी चर्चा केल्यानंतर चौकशीसाठी ताब्यात घेऊन त्यांच्यावर प्रश्नांची सरबत्ती करण्यात आली. अखेर चार तासांच्या चौकशीनंतर ईडीने त्यांना अटक केली आहे.

Sadanand Kadam: ठाकरेंची खेडमधील सभा यशस्वी झाली अन् सदानंद कदमांविरोधात ईडीच्या कारवाईची चक्रं फिरली?
दापोलीतील साई रिसॉर्ट प्रकरणी सदानंद कदम यांची चौकशी सुरू होती. साई रिसॉर्टशी संबंधित सदानंद कदम व अनिल परब यांचा प्रत्यक्ष अप्रत्यक्ष संबंध असल्याच्या आरोप किरीट सोमय्या यांनी केला होता.या संशयावरुन ही चौकशी सुरू आहे.

उद्धव ठाकरे ५ मार्च रोजी कोकणातील खेड शहरात गोळीबार मैदानात भव्य सभा झाली. या सभेसाठी उद्योजक सदानंद कदम यांनी पुढाकार घेऊन ताकद लावली. यावेळी सदानंद कदम यांनी उद्धव ठाकरे यांनी भेटही घेतली. या सगळ्या घडामोडीनंतर सदानंद कदम यांच्यावरती झालेली कारवाई चर्चेचा विषय ठरली आहे.

कोण आहेत सदानंद कदम?

• सदानंद कदम हे रामदास कदम यांचे बंधू आहेत
• दोघांमध्येही अनेक कारणांवरुन वाद आहेत
• सदानंद कदम राजकारणात फार सक्रिय नाहीत
• ठाकरे गटाचे नेते अनिल परब यांचे ते व्यावसायिक भागिदार आहेत