सागर दवणे हा हसन मुश्रीफ यांचा कट्टर कार्यकर्ता आहे. त्याने आपल्या अंगावर हसन मुश्रीफ यांचा टॅटू गोंदवून घेतला आहे. यापूर्वीही ईडीने मुश्रीफांच्या घरी धाड टाकली होती तेव्हाही आंदोलन करणाऱ्यांमध्ये सागर दवणे आघाडीवर होता. आजदेखील मुश्रीफांच्या घरी धाड पडल्याचे समजताच सागर दवणे त्याठिकाणी पोहोचला. यावेळी सागर दवणे यांनी ईडीच्या कारवाईचा निषेध करण्यासाठी जमिनीवर स्वत:च डोकं आपटून घेतलं. यामुळे त्याच्या डोक्याला मार बसला आणि कपाळातून रक्ताची धार वाहू लागली. हा प्रकार पाहून सर्वचजण अवाक झाले. इतर कार्यकर्त्यांनी सागर दवणे यांची समजूत काढण्याचा प्रयत्न केला. मात्र, सागर दवणे कोणाचेही ऐकण्याच्या मनस्थितीत नव्हता. या सगळ्या प्रकारामुळे मुश्रीफ यांच्या घराबाहेर जमलेले राष्ट्रवादी काँग्रेसचे कार्यकर्ते आणखी आक्रमक झाले आहेत.
आम्हाला अजून किती त्रास देणार, गोळ्या मारून संपवून टाका; मुश्रीफांच्या पत्नीने फोडला टाहो
‘मुश्रीफांच्या घरातील लहान मुलांना आणि बायकांना काही झाले तर याद राखा’
ईडीकडून हसन मुश्रीफ यांच्या घरी दुसऱ्यांदा धाड टाकण्यात आली आहे. आज पहाटेपासूनच ईडीच्या अधिकाऱ्यांकडून मुश्रीफ यांच्या घराची झाडाझडती सुरु आहे. यावेळी हसन मुश्रीफ घरी नसल्याची माहिती समोर आली आहे. त्यामुळे ईडीच्या अधिकाऱ्यांनी मुश्रीफ कुटुंबीयांची चौकशी केल्याचे समजते. यावेळी मुश्रीफांच्या घराबाहेर जमलेल्या कार्यकर्त्यांनी ईडीच्या अधिकाऱ्यांना इशारा दिला. साहेब नसताना ईडीचे अधिकारी पहाटे मुश्रीफ यांच्या घरी पोहोचले. या सगळ्यामुळे घरातील लहान मुलांना ताप भरला आहे. हसन मुश्रीफ यांच्या पत्नीला रडू कोसळले. घरातील कोणत्याही व्यक्तीला काही झाले तर आम्ही शांत बसणार नाही, असा इशारा राष्ट्रवादी काँग्रेसच्या कार्यकर्त्यांकडून देण्यात आला.
